កងទ័ពត្រូវបានពង្រាយ និងចល័តនៅក្បែរទីស្នាក់ការសង្គ្រោះជាតិ
សារព័ត៌មាន Cambodia News/
ភ្នំពេញ (០១ កញ្ញា ២០១៦ ) ៖ ឧទ្ធម្ភាគចក្រយោធា នាវាកងទ័ពជើងទឹក និងកងទ័ពជើងគោក កាលពីម្សិលមិញត្រូវបានដាក់ពង្រាយ និងចល័តចុះឡើងៗសម្រាប់ការ«ធ្វើសមយុទ្ធ» នៅជិតទីស្នាក់ការគណបក្សសង្គ្រោះជាតិក្នុងរាជធានីភ្នំពេញ បន្ទាប់ពីមន្រ្តីយោធាជាន់ខ្ពស់បានព្រមានថា កងទ័ពរបស់លោកត្រៀមខ្លួនរួចរាល់ដើម្បីចាប់ខ្លួនមេដឹកនាំគណបក្សប្រឆាំង។
ខណៈសកម្មជនគណបក្សប្រឆាំងមើលសកម្មភាពនេះនៅវេលាម៉ោង ៥ ល្ងាចឧទ្ធម្ភាគចក្រយោធាម៉ាក Z9 បួនគ្រឿងបានហោះចុះឡើងៗពីលើអគារទីស្នាក់ការគណបក្សសង្គ្រោះជាតិនៅផ្លូវជាតិលេខ ២ ជាច្រើនដងដែលជាកន្លែងអនុប្រធានគណបក្សសង្គ្រោះជាតិកំពុងស្នាក់នៅ។
ទន្ទឹមនេះនៅពីក្រោយទីស្នាក់ការដែលជាទន្លេបាសាក់ ឃើញមានអូប័រចំនួនពីរគ្រឿង និងនាវាល្បាតធំចំនួនមួយគ្រឿងដែលដាក់ទាហានជាង ២០ នាក់ក្នុងឯកសណ្ឋានប៉ារ៉ាបើកចុះឡើងៗ។ អូប័រ ១ ក្នុងចំណោមអូប័រទាំងនោះបានដាក់ទាហានប្រមាណ ៦ នាក់បានចតប្រហែល ៣០ ម៉ែត្រពីទីស្នាក់ការខណៈពីរទៀតបានចតនៅជិតនោះដែរ។ នេះបើតាមសាក្សីដែលបាននិយាយ។
នៅវេលាប្រហែលម៉ោង ៤ រសៀលក្បួនយោធាមួយទៀតដឹកទាហានប្រដាប់អាវុធដោយពាក់ម៉ាស់ដែលមានសញ្ញាសម្គាល់ថាជាកងអង្គរក្សរបស់លោកនាយករដ្ឋមន្រ្តី ហ៊ុន សែន ត្រូវបានឃើញធ្វើដំណើរកាត់ពីមុខទីស្នាក់ការ។
ការបង្ហាញសកម្មភាពនេះគឺបានធ្វើឡើងមួយថ្ងៃបន្ទាប់ពីមានបទសម្ភាសមួយជាមួយនាយឧត្តមសេនីយ៍ផ្កាយបួនលោក គន់ គីម នៅក្នុងនោះលោកបានថ្លែងថា កងទ័ពនឹង «ធានាចាប់ខ្លួន» មេដឹកនាំគណបក្សប្រឆាំងប្រសិនបើខ្លួនទទួលបានបញ្ជាពីតុលាការ៕
