ត្រៀមកម្លាំងជិត ២ម៉ឺននាក់ក្នុងពេលយុទ្ធនាការឃោសនាបោះឆ្នោត ឃុំ-សង្កាត់
សារព័ត៌មាន Cambodia News/
ភ្នំពេញ (២៦ សីហា ២០១៦) ៖ អគ្គស្នងការដ្ឋាននគរបាលជាតិ បានត្រៀមកម្លាំងចំនួន១៩.៣១១នាក់ សម្រាប់រក្សាសន្តិសុខសណ្តាប់ធ្នាប់ក្នុងពេលយុទ្ធនាការឃោសនាបោះឆ្នោត ឃុំ-សង្កាត់ ជូនគណបក្សនយោបាយ និងប្រជាពលរដ្ឋ ។
នេះបើតាមការថ្លៃងឲ្យដឹង ពីនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងជាប្រធានលេខាធិការដ្ឋាននៃគណៈបញ្ជាការសន្តិសុខអចិន្ត្រៃយ៍ នៅក្នុងពិធីប្រជុំផ្សព្វផ្សាយអន្តរស្ថាប័នស្តី ពីកិច្ចការពារការចុះឈ្មោះបោះឆ្នោត នាព្រឹកថ្ងៃទី២៥ សីហា ២០១៦។
លោកនាយឧត្តមសេនីយ៍មានប្រសាសន៍ថា ក្នុងអំឡុងនៃការស្រង់ឈ្មោះ រៀបចំបញ្ជីឈ្មោះបោះឆ្នោតនេះ អគ្គស្នងការដ្ឋាននគរបាលជាតិបានត្រៀមកម្លាំងចំនួន៥.២៣៦នាក់នៅទូ ទាំង២៥រាជធានី-ខេត្ត ហើយនៅក្នុងបរិវេណការិយាល័យចុះឈ្នោះបោះឆ្នោត នីមួយៗត្រូវដាក់កម្លាំងចំនួន២នាក់ ដើម្បីរក្សាការពារសន្តិសុខ និងសុវត្ថិភាពជូនប្រជាពលរដ្ឋ។
គួរបញ្ជាក់ថា នៅដើមខែកញ្ញា ការរៀបចំបញ្ជីឈ្មោះបោះឆ្នោតថ្មីនឹងត្រូវចាប់ផ្តើម មានរយ:ពេលបីខែ ហើយដំណើការបោះឆ្នោតក្រុមប្រឹក្សាឃុំ-សង្កាត់ នឹងធ្វើឡើងនៅដើមឆ្នាំ២០១៧ ចំណែកការបោះឆ្នោតថ្នាក់ជាតិវិញនឹងប្រព្រឹត្តទៅនៅឆ្នាំ២០១៨ ៕
