នាយករដ្ឋមន្ត្រី ឲ្យក្រសួងពាក់ព័ន្ធ ពិភាក្សាបញ្ហាបរិស្ថាន ជាមួយអង្គការ សង្គមស៊ីវិល រៀងរាល់៣ខែម្ដង
សារព័ត៌មាន Cambodia News/
ភ្នំ ពេញ (២២ សីហា ២០១៦) ៖ នៅព្រឹកថ្ងៃទី ២២ ខែ សីហា នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាឲ្យក្រសួងពាក់ព័ន្ធចំនួន៦ ក្នុងនោះរួមមាន ក្រសួងបរិស្ថាន ក្រសួងកសិកម្មរុក្ខាប្រមាញ់ និងនេសាទ ក្រសួងរៀបចំដែនដី នគរូបនីយកម្ម និងសំណង់ ក្រសួងរ៉ែនិងថាមល ក្រសួងឧស្សាហកម្មនិងសិប្បកម្ម និងក្រសួងធនធានទឹក និងឧតុនិយមត្រូវជួបប្រជុំពិភាក្សាដោះស្រាយបញ្ហាបរិស្ថាន ជាមួយអង្គការសង្គមស៊ីវិល និងភាគីពាក់ព័ន្ធ រៀងរាល់៣ខែម្ដង។
សម្ដេចតេជោ បានបញ្ជាក់ថា “ក្រសួងទាក់ទងទាំង៦ ត្រូវបន្តពិនិត្យ លើវិស័យព្រៃឈើ និងជលផល និងវិស័យអ្វីៗក៏ដោយត្រូវជួបគ្នា៣ខែម្តង ដើម្បីពិភាក្សាគ្នា…ខ្សាច់ខ្លះត្រូវបូមចេញ…ចឹង លោក តឹក វណ្ណារ៉ា យល់ព្រមទេ ជាមួយការសម្រេចរបស់ខ្ញុំ…លោកតឹក វណ្ណារ៉ាបានយល់ព្រមតាមសំណើរ របស់សម្តេច ឲ្យមានការជួបប្រជុំគ្នា ៣ខែម្តង ជាមួយក្រសួងសាមី…”។
សម្ដេចតេជោ បានថ្លែងបន្ថែមថា “…ខ្ញុំផ្តល់សិទ្ធិអំណាច ឲ្យបន្ថែមទៀត ដល់ក្រសួងពាក់ព័ន្ធ… អ្វីដែលត្រូវប្រកាន់យក ការពារធនធានធម្មជាតិ របស់យើង គឺក្រសួង ស្ថាប័នពាក់ព័ន្ធទាំងអស់ ត្រូវអញ្ជើញមកជួបប្រជុំគ្នា រាល់៣ខែម្តង…ការសម្រេចអំបាញ់មិញនេះមានតម្លៃស្មើនឹង កិច្ចប្រជុំគណៈរដ្ឋមន្ត្រី…យន្តការនេះ ក៏អាចធ្វើនៅថ្នាក់ខេត្តផងដែរ ទើបអាចមានប្រសិទ្ធភាព ហើយធ្វើនៅទីស្តីការ គណៈរដ្ឋមន្ត្រី និងក្រសួងនៅភ្នំពេញ គឺឆ្ងាយណាស់…ប៉ុន្តែបើរឿងកើតឡើង នៅធ្វើនៅតាមមូលដ្ឋាន កើតឡើងតែម្តង ដូចជាព្រៃកោងកាងជាដើម…”៕
