អាជីវករក្នុងផ្សារសាមគ្គីក្រគរអាចលក់ដូរតកូនតចៅ
សារព័ត៌មាន Cambodia News/
ពោធិ៍សាត់ (១០ សីហា ២០១៦) ៖ នៅរសៀលថ្ងៃទី៩ ខែសីហា សម្តេចតេជោ ហ៊ុន សែនបានអញ្ជើញសំណេះសំណាលជាមួយមួយមន្ត្រីរាជការនិងកងកម្លាំងប្រដាប់ អាវុធនៅក្នុងខេត្តពោធិ៍សាត់ ហើយក្នុងឱកាសនេះសម្ដេចតេជោបានសម្រេចអោយអាជ្ញាធរខេត្តរៀបចំចេញ ប័ណ្ណបញ្ជាក់អោយអាជីវករដែលកំពុងលក់ដូរនៅក្នុងផ្សារសាមគ្គីក្រគរ នៃក្រុងពោធិ៍សាត់ គឺពួកគាត់អាចលក់ដូរតកូនតចៅ តែគ្មានសិទ្ធិលក់អោយទៅអ្នកដ៍ទៃបានទេ ព្រោះជាទ្រព្យសម្បត្តិរដ្ឋ ។
ទន្ទឹមនោះ សម្តេចតេជោ បានរំលឹកដល់មន្ត្រីទាំងអស់ត្រូវយកចិត្តទុកដាក់រក្សាសន្តិសុខ សណ្ដាប់ធ្នាប់សង្គម រួមមានការបង្ក្រាបនូវបទល្មើសការជួញដូរគ្រឿងញៀន ដើម្បីផ្តល់ភាពកក់ក្តៅនិង ធានាដល់សុវត្ថិភាពនៃការរស់នៅ និងការប្រកបរបរការងាររបស់ពលរដ្ឋ។ត្រូវយកចិត្តទុកដាក់ក្នុងការ ផ្តល់នូវសេវាសាធារណៈ រួមទាំងសេវាតម្រូវការចាំបាច់ទាំងឡាយ និងសេវាសំណូមពរនានាជូនប្រជាពលរដ្ឋអោយបានឆាប់រហ័ស។
សម្តេច បានបញ្ជាក់ទៀតថា មន្ត្រីត្រូវគិតថាខ្លួនជាអ្នក បម្រើប្រជាពលរដ្ឋហើយត្រូវដាក់ខ្លួនអោយទាបនិងខិតខំបំបាត់អោយអស់នូវ ភាពអសកម្មនានា។កងកម្លាំងប្រដាប់អាវុធ នគរបាល និងមន្ត្រីពាក់ព័ន្ឋទាំងអស់ត្រូវចូលរួមសហការណ៍ប្រមូលពន្ធដើម្បី ពង្រឹងចំណូលថវិកាជាតិ។អាជ្ញាធរត្រូវយកចិត្តទុកដាក់លើការការពារ ធនធានព្រៃឈើ និងយកចិត្តទុកដាក់ដោះស្រាយជម្លោះដីធ្លីរបស់ប្រជាពលរដ្ឋ។ត្រូវរក្សា ទំនាក់ទំនងមិត្តភាពល្អជាមួយប្រទេសថៃ ហើយត្រូវយកចិត្តទុកដាក់មើលកម្មករកម្មការនីយើងអោយបានដិតដល់៕
