ការធ្វើជំនួញលើខ្មោច ទុកឲ្យខ្មោចទូទាត់
បទអត្ថាធិប្បាយ
ឆាយ សុផល
ខុសផ្លែកពីអ្នកប្រកបរបរទទួលរៀបចំបុណ្យសព មានដូចជា អ្នកធ្វើម្ហូប អ្នកលក់ក្តារមឈូស ពេទ្យចាក់ថ្មាំរក្សាសព អាចារ្យខ្មោចខ្មែរចិន អ្នកទទួលរៀបចំដាក់ផ្កាភ្ញី។ល។ គឺតែងតែទទួលបានប្រាក់កំរៃខ្លះពីសេវានិងការចំណាយមុនរបស់ខ្លួន។ ក្រៅពីនោះ ដូចជា បងប្អូន សាច់ញាតិ មិត្តភក្តិ និងសហការីនៃសពព្រមទាំងអ្នកទីទៃមិនត្រូវចង់បានចំណេញទាំងលុយកាក់ នយោបាយ និងអំណាច ពីសពឡើយ។
ការយកចំណេញពីសពគឺនាំមានបញ្ហាពីរគឺ៖
ទី១៖ ការកឹបកេងផ្នែក “លុយកាក់” ពីបុណ្យសពដែលធ្វើឲ្យអ្នកនៅរស់ជួបបញ្ហា គឺជាអំពើថោកផង និងអំពើបាបផង។ បើទោះជាអ្នកទទួលរងនៃការកឹបកេងខ្លះមិនចង់តតាំង ទោះជាលុយកាក់នោះប៉ុន្មានក៏ដោយ ក៏ព្រលឹងខ្មោចនឹងជួយទូទាត់ជំនួសនៅពេលណាមួយដែរ។ វាក៏រិតតែស្មោកគ្រោក និងថោកសួពូជទៅទៀត នៅពេលដែលខ្លួនកឹបកែលុយបុណ្យសពហើយ ខ្លួនបែរជាបំភ្លៃដំណឹងបែបលាមកឲ្យគេឯងយល់ច្រឡំថា ខ្លួនដែលជាអ្នកកឹបកេងលុយជាមនុស្សចិត្តធម៌ ជាអ្នកធ្វើបុណ្យ ហើយមកទម្លាក់កំហុសលើអ្នកដែលចំណាយដោយស្មោះទាំងកម្លាំងកាយ និងចិត្ត ព្រមទាំងប្រាស់កាសដែលខ្លួនមានបន្តិចបន្តួចថាជាមនុស្សអាក្រក់ទៅវិញ។ ទោះជាយ៉ាងនេះក្តី អំពើថោកនៅតែថោក និងទុយ៌យ អសោចកេរ្ត៌ ឆ្អេះឆ្អាប ស្អុយជាងលាមកទាំងនៅក្នុងចំណោមបងប្អូនញាតិមិត្ត និងក្នុងសង្គម បើទោះជាខ្លួនធ្វើឬកខែងរែង ថ្កំថ្កើងក៏ដោយ។
ទី២៖ រឿងកឹបកេងចំណេញផ្នែក “នយោបាយ និងប្រយោជន៍អំណាច” ពីខ្មោចគឺមានកក្តាពីរទី១ មនុស្សបានស្លាប់ទៅជាសាកសពគឺជាការសោកសង្រេងពេកណាស់ទៅហើយរបស់គ្រួសារនៃសព ហើយទី២គឺរិតតែធ្វើឲ្យក្តុកក្តួលរំជួលចិត្តបន្ថែមទៀត ដែលយកខ្មោចទៅធ្វើជំនួញយកចំណេញទៅតាមមហិច្ឆតារបស់ខ្លួន ដែលធ្វើព្រលឹងខ្មោចខ្លោចផ្សារនៅវិលវល់រកចាប់ជាតិមិនបាន។
គិតទៅមនុស្សលោក (មិនទាំងអស់នោះទេ) កុំថាឡើយយកចំណេញលើមនុស្សនៅរស់ ពេលមនុស្សក្លាយខ្មោចក៏នៅតាមកេងចំណេញតាមជំនាញបែបថោក ឬថ្លៃរៀងៗខ្លួនដែរ។ បើធ្វើអីចឹងបានចេះតែធ្វើទៅ ចាំទុកឲ្យខ្មោចទូទាត់សងវិញ ទៅតាមជំនាញរបស់ខ្មោចទៅចុះ៕
