ម៉ូតូប៉ះជាមួយរថយន្តខ្ទាតចូលក្រោមកង កិនបែកក្បាលស្លាប់
សារព័ត៌មាន Cambodia News/
កណ្តាល (២៨ កក្កដា ២០១៦) ៖ កាលពីវេលាម៉ោង១២និង៣០នាទីរសៀល ថ្ងៃទី២៧ ខែកក្កដា ឆ្នាំ២០១៦ បុរសម្នាក់បានស្លាប់ ក្នុងឧប្បត្តិហេតុគ្រោះថ្នាក់ចរាចរណ៍ លើកំណាត់ផ្លូវជាតិលេខ១ចំណុចចន្លោះបង្គោលគីឡូម៉ែត្រលេខ២១-២២ ស្ថិតក្នុងភូមិកោះចិន ឃុំគគីរ ស្រុកកៀនស្វាយ។
ជនរងគ្រោះជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ផ្លាកលេខភ្នំពេញ1FM-5510 ក្នុងទិសដៅពីអ្នកលឿងទៅភ្នំពេញហើយប៉ះជាមួយរថយន្តដឹកដីបណ្តាល ឲ្យដួលខ្ទាតមនុស្សទៅចូលក្រោមរថយន្តកុងតឺនរ័ ហើយកិនស្លាប់យ៉ាងអណោចអធម្ម។
រថយន្តបង្កទាំង២គ្រឿង បានរត់គេចខ្លួនបាត់ នៅសល់តែម៉ូតូជនរងគ្រោះនៅកន្លែងកើតហេតុ ត្រូវសមត្ថកិច្ចនគរបាលចរាចរណ៍ស្រុកកៀនស្វាយ ចុះធ្វើការវាស់វែងយកម៉ូតូមករក្សាទុកនៅផ្នែកសណ្តាលធ្នាប់ស្រុក បណ្តោះអាសន្ន។
ចំណែករថយន្តបង្កសមត្ថកិច្ចបន្តតាមដាន ស្រាវជ្រាវដើម្បីចាប់យកមក ឲ្យដោះស្រាយគ្នាតាមនីតិវិធី។ សាកសពជនរងគ្រោះត្រូវសមត្ថកិច្ចប្រគល់ឲ្យ ឪពុកយកទៅធ្វើបុណ្យតាមប្រពៃណី៕
