មនុស្សស្រឡាញ់ភេទដូចគ្នាក៏អាចចូលរួមអភិវឌ្ឃសង្គមដែរ
ដោយកញ្ញា ស៊ុន ដាលីន/Cambodia News
បទយកការណ៍/Feature
មានរាងតូចល្អិត ភ្នែកតូចៗ និងសម្បុរស ដែលមើលទៅទំនងជាកូនកាត់ចិន យុវជនម្នាក់មានចរិតមាយាទដូចជាស្រ្តី។
ស្ថិតក្នុងវ័យ ២៦ ឆ្នាំ ង៉ោ ម៉េងហ៊ួង បាននិយាយដោយមិនលាក់លៀមថា ថ្វីត្បិតតែខ្លួនគេកើតមកជាប្រុសក៏ដោយ តែខ្លួនគេស្រឡាញ់តែប្រុសៗដូចគ្នាប៉ុណ្ណោះ។
ម៉េងហ៊ួង បានរៀបរាប់ថា ខ្លួនគេបានដឹងយ៉ាងច្បាស់ថា ខ្លួនជាមនុស្សស្រឡាញ់ភេទដូចគ្នាតាំងពីអាយុបាន ៧ ឆ្នាំ ហើយថា ចរិតបែបនេះមានពីធម្មជាតិរបស់ខ្លួន ដោយគ្មានទទួលឥទ្ធិពលពីមិត្តភក្តិនោះទេ។ ម៉េងហ៊ួង បានប្រាប់ថា “ខ្ញុំចូលចិត្តស្លៀកសំលៀកបំពាក់ស្រី និងមានពេលខ្លះ ខ្ញុំយកសំលៀកម៉ាក់របស់ខ្ញុំមកស្លៀកពាក់តាំងពីខ្ញុំអាយុ ៥ ឬ ៦ឆ្នាំមកម្លេះ”។
ម៉េងហ៊ួង ជាបុរសម្នាក់ក្នុងចំណោមបុរសជាច្រើនទៀតដែលគេចាត់ទុកក្នុងក្រុម “បុរសស្រឡាញ់បុរស” និងក្រុម “ស្រីស្រស់ ឬក្រុមមនុស្សប្រុសតែងខ្លួនជាស្រីយកបុរសគ្នាឯងធ្វើជាប្តី”។
មកដល់បច្ចុប្បន្ននេះ បើទៅជានៅមិនទាន់មាតួលេខច្បាស់លាស់ ថាតើនៅក្នុងប្រទេសកម្ពុជាមានចំនួនបុរសស្រឡាញ់បុរសប៉ុន្មាននាក់នៅឡើយ ក៏លោកវេជ្ជបណ្ឌិត ទិត ឃីមុយ នាយករងរបស់អង្គការខាណាបាននិយាយថា អង្គការខាណារួមជាមួយអង្គការ FHI រកឃើញជាបឋមកាលពីឆ្នាំ ២០០៨ ថាមានប្រមាណជាងពីរម៉ឺននាក់ ហើយថា កាលពីពេលថ្មីៗនេះមានការរកឃើញថាចំនួន “ក្រុមទន់ ឬក្រុមសក់វែង ឬក្រុមមានអាកប្បកិរិយាម្ញ៉ិកម្ញ៉ក់” មានប្រមាណជិតបីពាន់នាក់។
កន្លងមក លោកស្រីវេជ្ជបណ្ឌិត នូ វណ្ណារី អតីតប្រធានផ្នែកគាំទ្របច្ចេកទេសរបស់អង្គការខាណាបានបញ្ចាក់ថា បុរសស្រឡាញ់បុរសចែកចេញជាពីរប្រភេទ គឺ “ក្រុមសក់វែង” និង “ក្រុមសក់ខ្លី” ប៉ុន្តែថ្មីនេះគេបានបែងចែកជា “ក្រុមរឹង ឬក្រុមដែលមានចរិតមាំទាំដូចជាបុរស” និង “ក្រុមទន់ ឬក្រុមមានអាកប្បកិរិយាម្ញ៉ិកម្ញ៉ក់”។
“ក្រុមទន់ ឬក្រុមសក់វែង ឬក្រុមមានអាកប្បកិរិយាម្ញ៉ិកម្ញ៉ក់” តែងតែបង្ហាញខ្លួនជាស្រី និងសម្តែងឲ្យដឹងថា ខ្លួនស្រឡាញ់តែបុរសៗ។ ចំណែកឯ “ក្រុមរឹង ឬក្រុមសក់ខ្លី” ខ្លះលាក់មុខ ហើយខ្លះក៏បង្ហាញជាទូទៅថា ខ្លួនជាបុរសស្រាឡាញ់បុរសដូចគ្នា ហើយក្រុមនេះអាចរួមភេទបានទាំងបុរសទាំងនារី។
នៅក្នុងក្របខ័ណ្ឌមេរោគអេដស៍និងជំងឺអេដស៍ ក្រុម “បុរសស្រឡាញ់បុរស” និងក្រុម “ស្រីស្រស់” ត្រូវបានស្ថាប័នជំនាញពាក់ព័ន្ធនឹងការងារប្រយុទ្ធនឹងជំងឺអេដស៍ទាំងថ្នាក់ជាតិ និងសហគមន៍ចាត់ទុករួមជាមួយ “ស្រ្តីបម្រើសេវាកម្សាន្ត” និង “អ្នកប្រើប្រាស់គ្រឿងញៀន” ថាជា “ក្រុមគោលដៅប្រឈមមុខខ្ពស់”។
បើតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគនៃក្រសួងសុខាភិបាលបានឲ្យដឹងថា អត្រាប្រវ៉ាឡង់នៃការឆ្លងមេរោគអេដស៍នៅមានកម្រិតខ្ពស់នៅឡើយក្នុងចំណោមបុរសស្រឡាញ់បុរសមានគឺមានប្រមាណជា ២,១% ហើយក្រុមស្រីស្រស់មាន ៩,៨%។
លោក ជួប សុខចំរើន នាយករងទទួលបន្ទុកប្រតិបត្តិការទូទៅរបស់អង្គការខាណាបាននិយាយថា ក្រុមបុរសស្រលាញ់បុរសខ្លះអាចរួមភេទបានទាំងជាមួយបុរសនិងជាមួយស្រ្តី ហើយបុរសស្រលាញ់បុរសខ្លះទៀតនៅយល់ខុសថា ការរួមភេទជាមួយបុរសដូចគ្នាមិនមានឆ្លងមេរោគអេដស៍ឡើយ។
ដោយសារតែសង្គមនិងផ្នត់គំនិតជាទូទៅរបស់ប្រជាជនកម្ពុជានៅមិនទាន់ទទួលស្គាល់ពីសិទ្ធិរបស់បុរសស្រឡាញ់បុរស ដែលប្រជាជនទូទៅហៅថា “ខ្ទើយ” នោះ ការមាក់ងាយនិងការរើសអើងបានកើតមានចំពោះពួកគេ។ ការមាក់ងាយ ការរើសអើង និងការមិនយកចិត្តទុកដាក់ពីគ្រួសារ ពីសហគមន៍ និងពីសង្គមទាំងមូលបានធ្វើឲ្យសមាជិកភាគច្រើនក្នុងក្រុមនេះលាក់មុខ ហើយមិនហ៊ានចេញជាសាធារណៈមកទទួលការអប់រំ សេវាសុខភាព និងសេវាសង្គមឯទៀតៗ។
សម្រាប់ ម៉េង ហ៊ួង វិញ រូបគេបានបញ្ជាក់ថា «ចំពោះខ្ញុំៗគិតថាការដែលខ្ញុំមានចិត្តជាមនុស្សស្រលាញ់ភេទដូចគា្ន បណ្តាលមកពីធម្មជាតិរបស់ខ្ញុំ គឺបេះដូងខ្ញុំនិងចិត្តខ្ញុំមានទំនោរទៅរកវាតែម្តង”។
កន្លងមក ម៉េងហ៊ួង បានទទួលការស្តីបន្តោសពីគ្រួសារនិងសាច់ញាតិ្ត ហើយទទួលការរិះគន់ រើសអើងជាច្រើនពីសំណាក់មិត្តភក្តិទាំងនៅសាលា ទាំងនៅកន្លែងការងារ និងពីអ្នកនៅជុំវិញខ្លូនជាច្រើន ដែលធ្វើឲ្យខ្លួននឹកតូចចិត្ត ហើយឆ្ងល់ថា ហេតុអ្វីបានជាមនុស្សមិនឲ្យតម្លៃមនុស្សដូចគ្នា។
ម៉េងហ៊ួង បានប្រាប់ថា “ក្រុមគ្រួសារខ្ញុំស្តីឲ្យថា ហេតុអីក៏ធ្វើអីឆ្កួតៗចឹង តែងជាមនុស្សស្រីចឹង។ ចំណែកអ្នកនៅជុំវិញខ្លួនវិញក៏មាក់ងាយ និងពេបជ្រាយឲ្យខ្ញុំដែរ។ ជាងនេះទៅទៀត ខ្ញុំក៏បានទទួលការរើសអើងពីបណ្តាអង្គការមួយចំនួនដែលខ្ញុំបានដាក់ពាក្យចូលធ្វើការផងដែរ”។
ម៉េងហ៊ួងបានរំលឹកពីក្រុមហ៊ុនមួយដែលបានរើសអើងខ្លួនជាមនុស្សបប្រុសមិនប្រុសស្រីមិនស្រីដោយមិនឲ្យជាប់ជាបុគ្គលិក ទោះបីជារូបគេមានសមត្ថភាពគ្រប់គ្រាន់នឹងធ្វើការងារក៏ដោយ។
បច្ចុប្បន្ន ម៉េងហ៊ួង ជាមន្ត្រីទំនាក់ទំនងនៃអង្គការហ្រ្វេនអីនធឺណាសិនណល ហើយក្រៅពីការ ងារ រូបគេបានព្យាយាមលើកស្ទួយនិងទាមទារសិទ្ធិជូនបុរសស្រឡាញបុរស ព្រមទាំងលើកកម្ពស់ការយល់ដឹងដល់ពួកគេតាមរយៈការសសេរជាអត្ថបទព័ត៌មាន ការចូលរួមធ្វើជាវាគ្មិន ការចែករំលែកបទពិសោធន៍ និងផ្តល់មតិយោបល់នៅតាមវិទ្យុ ចូលរួមផលិតខែ្សភាពយន្តឯកសារអប់រំដែលទាក់ទងទៅនឹងក្រុមមនុស្សស្រលាញ់ភេទដូចគា្ន និងចូលរួមកម្មវិធីផ្សេងៗដែលផ្តោតទៅលើការលើកស្ទួយ និង ផ្តល់សិទ្ធិដល់ក្រុមនេះ។
ម៉េងហ៊ួង បាននិយាយដោយសំដីម៉ាត់ៗថា ទោះបីជាមនុស្សប្រុសមានចរិតជាស្រីដូចជារូបលោក មានចិត្តទន់ជ្រាយបន្តិចមែន ក៏ពួកគេអាចធ្វើការដូចមនុស្សដទៃទៀតបានដែរ សំខាន់គឺ “ចំណេះដឹងនិងសមត្ថភាព”។
ក្រៅពីសំណូមពរឲ្យស្ថាប័នរដ្ឋនិងមិនមែនរដ្ឋក៏ដូចជាវិស័យឯកជនឲ្យផ្តល់ឱកាសការងារ និង សិទ្ធិស្មើគ្នាដល់ក្រុមមនុស្សស្រឡាញ់ភេទដូចគ្នា ម៉េង ហ៊ួង ក៏បានអំពាវនាវឲ្យមនុស្សស្រឡាញ់ភេទដូចគ្នាទាំងអស់ត្រូវខិតខំប្រឹងប្រែងដោយ “ផ្តល់តម្លៃឲ្យខ្លួនឯងជាមុនសិន ហើយព្យាយាមអភិវឌ្ឍខ្លួន កុំធ្វើអ្វីឲ្យខុសច្បាប់ និងចេះបង្ហាញឲ្យគេគ្រប់គ្នាឃើញថា ខ្លួនអាចធ្វើបាន នោះទើបគេឲ្យតម្លៃយើងតាមក្រោយ”៕ អត្ថបទនេះផលិតឡើងក្រោមជំនួយសប្បុរសធម៌ពីប្រជាជនអាមេរិកតាមរយៈ USAID។ រាល់ខ្លឹមសារដែលមានក្នុងអត្ថបទនេះគឺជាការទទួលខុសត្រូវរបស់អង្គការខាណា និងមិនបានឆ្លុះបញ្ចាំងទស្សនៈរបស់ USAID ឬរដ្ឋាភិបាលអាមេរិកឡើយ៕
