ឪពុកធម៌របស់សម្តេចតេជោ នឹងបានរស់នៅក្នុងផ្ទះថ្មី នាដើមខែសីហាខាងមុខនេះ
សារព័ត៌មាន Cambodia News/
ភ្នំពេញ (២៥ កក្កដា ២០១៦) ៖ តាមផេកហ្វេសប៊ុក របស់សម្តេចតេជោនាយករដ្ឋមន្ត្រីកម្ពុជា បានសរសេរនាព្រឹកថ្ងៃទី២៥ ខែកក្កដានេះថា យើងទាំងអស់គ្នាប្រាកដជាចាំបានថា លោកតាធាក់ស៊ីក្លូអាយុ ៨៩ ឆ្នាំម្នាក់នេះបានតស៊ូធាក់ស៊ីក្លូ ដើម្បីជីវិតរស់នៅចុងក្រោយរបស់លោកតាផង និងដើម្បីចៅប្រុសផង ទោះបីមានវ័យចំណាស់ដល់ថ្នាក់ នេះក៏ដោយ។
ដោយសារការតស៊ូអំណត់ព្យាយាមខិតខំជួយខ្លួនឯង ទើបលោកតាត្រូវបានទទួលការ អាណិតពីបងប្អូនប្រជាពលរដ្ឋ ជាពិសេសទទួលបានក្តីស្រឡាញ់និងសណ្តោសពីសម្តេចតេជោ។
នេះ ជាផ្ទះរបស់ លោកតា ពុត សឿន អាយុ៨៩ ឆ្នាំ ដែលលោកតាប្រាថ្នាចង់បានផ្ទះរស់នៅសម្រាប់ជីវិត ចុងក្រោយ។ ផ្ទះនេះគឺស្ថិតនៅ ភូមិសង្កែ ឃុំឈើទាល ស្រុកស្វាយជ្រុំ ខេត្តស្វាយរៀង ដែលជាអំណោយរបស់ សម្តេចតេជោ ហ៊ុន សែន កំពុងសាងសង់សំរេចបានប្រមាណជា ៧០%ហើយ។ ផ្ទះនេះបានសាងសង់ពីដើមខែកក្កដា និងបញ្ចប់រួចរាល់នៅដើមខែ សីហា ២០១៦ ខាងមុខនេះ ដែលមានប្រវែង ៨ x១២ ម៉ែត្រ បន្ទប់ធំមួយ មានអាងទឹក បន្ទប់ទឹកក្នុង និងតទៅក្រោយមួយទៀត ព្រមទាំងមានខឿន សងខាងផ្ទះផងដែរ។
សូមអរគុណជនរួមជាតិដែលបាន ចូលរួមចំណែក និងសូមជូនពរលោកតា ពុត សឿន បានរស់នៅក្នុង ផ្ទះថ្មីសុខសប្បាយ និងជួបប្រទះតែសេចក្តីសុខគ្រប់ៗពេល៕ ដោយ ៖ ហេង នាង
