រដ្ឋមន្ត្រីក្រសួងអប់រំលើកឡើងថា សិស្សស្រីភាគច្រើនរៀនពូកែជាងសិស្សប្រុស
សារព័ត៌មាន Cambodia News/
ភ្នំពេញ (២២ មីនា ២០១៧) ៖ ថ្លែងសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០១៥-២០១៦ និងលើកទិសដៅឆ្នាំសិក្សា ២០១៦-២០១៧ ឯកឧត្ដមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឱ្យដឹងថា បច្ចុប្បន្ននេះលទ្ធផលសិក្សាក្នុងប្រទេសកម្ពុជា មិនថាតាមសាកលវិទ្យាល័យ ឬវិទ្យាល័យនោះទេ សិស្សស្រីគឺមានលទ្ធផលសិក្សាល្អប្រសើរជាងសិស្សប្រុសដាច់តែម្ដង។
ឯកឧត្ដមបណ្ឌិត ហង់ ជួនណារ៉ុន បញ្ជាក់ថា មូលហេតុបានជាសិស្សប្រុសរៀនចាញ់សិស្សស្រី ព្រោះ សិស្សប្រុសភាគច្រើនមិនសូវផ្ដោតលើការសិក្សាប៉ុន្មានទេ គឺចូលចិត្តលេងច្រើនមិនសូវមានសមាធិក្នុងការសិក្សា។ ការលេងច្រើនរបស់សិស្សប្រុសនេះ ឯកឧត្ដមបណ្ឌិត ហង់ ជួនណារ៉ុន សំដៅទៅលើទូរសព្ទទំនើបៗ លេងហ្គេម ហ្វេសប៊ុក Line Instagram ជាដើមដែលជាមូលហេតុធ្វើឱ្យការសិក្សាធ្លាក់ចុះ។
ចំពោះមូលហេតុបានជាសិស្សស្រី រៀនពូកែ និងមានលទ្ធផលសិក្សាល្អជាងសិស្សប្រុសនោះ ព្រោះ សិស្សស្រី មានការតាំងសមាធិក្នុងការសិក្សាល្អជាង។ មិនត្រឹមតែប៉ុណ្ណោះសិស្សស្រីភាគច្រើនមិនសូវលេងច្រើន បើជាអ្នករៀនគឺមានការតាំងចិត្តខ្ពស់បានល្អជាងសិស្សប្រុស។ នេះបើតាមការលើកឡើងរបស់រដ្ឋមន្ត្រី ក្រសួងអប់រំ យុវជន និងកីឡា៕