កម្ពុជាអាចនឹងប្រើសត្វកណ្តុរដើម្បីជួយដោះមីននៅថ្ងៃខាងមុខនេះ
សារព័ត៌មាន Cambodia News/
ភ្នំពេញ (២២ មិថុនា ២០១៦) ៖ អង្គការអាប៉ូប៉ូបាន និយាយក្នុងសេចក្តីប្រកាសព័ត៌មានមួយដែលបង្ហោះលើទំព័រហ្វេសប៊ុក របស់ខ្លួនថា សត្វកណ្តុរអាហ្វ្រិក១៤ក្បាល បានចាប់ផ្តើមហិតរកគ្រាប់មីននិងយុទ្ធភណ្ឌមិនទាន់ផ្ទុះកាលពីថ្ងៃ ទី៣ខែឧសភាលើផ្ទៃដី៨,៩ហិកតា មុនពេលបោសសម្អាតការដ្ឋានទាំងស្រុងក្នុងស្រុកវ៉ារិន ខេត្តសៀមរាបកន្លងទៅ។
លោក ហេង រតនា អគ្គនាយកស៊ីម៉ាក់ បានមានប្រសាសន៍បានបញ្ជាក់ប្រាប់បណ្ដាញសារព័ត៌មានក្នុងស្រុកមួយថា សត្វកណ្តុរបានជួយពួកគេរកឃើញគ្រាប់មីនក្នុងដី និងយុទ្ធភណ្ឌមិនទាន់ផ្ទុះ១៣គ្រាប់ ភាគច្រើនជាមីនប្រឆាំងមនុស្សប្រភេទ៧២អា ធ្វើនៅប្រទេសចិន ដែលត្រូវបានប្រើជាញឹកញាប់ដោយខ្មែរក្រហម។
លោក រតនា បានបន្ដថា លោកមិនអាចធ្វើអត្ថាធិប្បាយអំពីសមត្ថភាពរបស់សត្វកណ្តុរបាននៅឡើយទេ ពីព្រោះគម្រោងនេះស្ថិតក្នុងដំណាក់ការសាកល្បងនៅឡើយ ប៉ុន្តែរហូតមកដល់ពេលនេះ “លទ្ធផលវិជ្ជមានណាស់”។
គួរបញ្ជាក់ថា អង្គការអាប៉ូប៉ូបានចាប់ផ្តើមបង្ហាត់សត្វកណ្តុរឲ្យដោះមីននៅប្រទេស តង់ហ្សានីក្នុងឆ្នាំ២០០៨និងបានបោសសម្អាតចម្ការមីនដោយជោគជ័យនៅ ប្រទេសម៉ូហ្សំប៊ិក និងប្រទេសអង់ហ្គោឡានៅឆ្នាំ២០១០។ នៅខែវិច្ឆិកាឆ្នាំ២០១៣អង្គការនេះទទួលបានការអនុញ្ញាតឱ្យ ចាប់ផ្តើមសាកល្បងនៅប្រទេសកម្ពុជា៕
