ការវាយប្រហារដោយរថយន្តបំផ្ទុះគ្រាប់បែកអត្តឃាតនៅភាគខាងកើតរដ្ឋធានីបាដាដបណ្ដាលឲ្យមនុស្ស ១១នាក់ស្លាប់
សារព័ត៌មាន Cambodia News/
អ៊ីរ៉ាក់ (២៦ មេសា ២០១៦) ៖ តាមប្រភពពីកងកម្លាំងសន្តិសុខ និងគ្រូពេទ្យបានឲ្យដឹងថា រថយន្តផ្ទុកគ្រាប់បែកមួយគ្រឿងបានផ្ទុះ ក្នុងស្រុកសំបូរដោយអ្នកកាន់សាសនាអ៊ីស្លាមនីកាយស៊ីអ៊ីត នាភាគខាងកើតរដ្ឋធានីបាដាដកាលពីថ្ងៃចន្ទ២៥ មេសា សម្លាប់មនុស្ស ១១នាក់ និង ៣៩នាក់ផ្សេងទៀតរងរបួស ដែលនេះជាការផ្ទុះលើកទី៣ ហើយក្នុងរយៈពេល ៤ថ្ងៃក្នុងរដ្ឋធានីនេះ។
មិន មានការអះអាងទទួលខុសត្រូវសម្រាប់ការផ្ទុះ ជិតរោងភាពយន្តមួយក្នុងស្រុកបាដាដអាល់ចាឌីដា ប៉ុន្តែទំនងជាក្រុមរដ្ឋអ៊ីស្លាមនីកាយស៊ុននីដែលបានអះអាង សម្រាប់ការវាយប្រហារចំនួន២ កាលពីចុងសប្ដាហ៍កន្លងទៅ ហើយ ជារឿយៗក្រុមនេះតែងដាក់គោលដៅលើតំបន់ទីផ្សារពាណិជ្ជកម្ម និងសំបូរពលរដ្ឋកាន់សាសនាអ៊ីស្លាមនីកាយស៊ីអ៊ីតរស់នៅ។
ការ ផ្ទុះនេះបានបង្កឲ្យកើតមានជាអណ្ដាតភ្លើងឆាបឆេះរថយន្តយ៉ាងតិច ៥គ្រឿង និងហាងជាច្រើននៅលើដងផ្លូវលក់ដូរដ៏មមាញឹកមួយ អំឡុងពេលល្ងាចមានមនុស្សកកកុញ។
គួររម្លឹកថា សន្តិសុខបានរឹតបន្តឹងជាបន្តបន្ទាប់ក្នុងរដ្ឋធានីបាដាដ ដែលជាគោលដៅនៃការបំផ្ទុះគ្រាប់បែកជាប្រចាំមួយទសវត្សរ៍មកហើយ បើទោះជាការវាយប្រហារប្រឆាំងនឹងកងកម្លាំងសន្តិសុខ និងជនស៊ីវិលកាន់សាសនាអ៊ីស្លាមនីកាយស៊ីអ៊ីត នៅតែកើតមានជាញឹកញាប់ក៏ដោយក្ដី៕
