សាលារាជធានីភ្នំពេញ ធានាជួយរកការងារឱ្យបងប្អូនពិការទាំងអស់ធ្វើ
សារព័ត៌មាន Cambodia News/
ភ្នំពេញ (១២ កុម្ភៈ ២០១៦) ៖ ក្រោយការសម្រេច របស់សាលារាជធានីភ្នំពេញ មិនអនុញ្ញាតអោយ មានការធ្វើអាជីវកម្មលើជនពិការ ច្រៀងនៅតាមភ្លើងស្តុប ដើម្បីអង្គៀសប្រាក់ នោះពេលនេះ ឯកឧត្តម ប៉ា សុជាតិវង្ស អភិបាល នៃគណៈអភិបាល រាជធានីភ្នំពេញ បានប្រកាសថា នឹងធានាជួយរកការងារឲ្យបងប្អួនជនពិការទាំងអស់ធ្វើ។
ឯកឧត្តមបានថ្លែង នៅលើទំព័រ Facebook ថា “សាលារាជធានីភ្នំពេញ សូមធានាជួយរកការងារឱ្យបងប្អូនពិការទាំងអស់ ប៉ុន្តែត្រូវបញ្ឈប់ការធ្វើអាជីវកម្មលើជនពិការតទៅទៀត។ ការងារសំខាន់ៗដែលយើងត្រូវធ្វើបន្តទៀត ជាមួយក្រុមប្រឹក្សាសកម្មភាពជនពិការគឺ៖
១-គ្រប់គ្រងឱ្យបាននូវចំនួនជនពិការទាំងអស់ទូទាំងរាជធានីភ្នំពេញ ហើយកំណត់ឱ្យច្បាស់ពីអត្តសញ្ញាណរបស់ពួកគាត់ ថា នៅតាមគ្រួសារ ឬនៅតាមអង្គការ បើពួកគាត់ចង់នៅមណ្ឌល យើងត្រូវបញ្ជូនទៅមណ្ឌលរបស់យើង ដោយមានការឧបត្ថម្ភ និងបីបាច់ថែរក្សាត្រឹមត្រូវ។
២-ពិនិត្យមើលឡើងវិញថា អង្គការណាខ្លះធ្វើការជាមួយជនពិការ មានច្បាប់ ឬអត់ច្បាប់ ហើយអង្គការដែលមានច្បាប់បានអនុវត្តគោលការណ៍របស់ខ្លួនហើយ ឬនៅ?
៣-រៀបចំបណ្ដុះបណ្ដាលទៅតាមសមត្ថភាពរបស់ពួកគាត់ ដើម្បីបន្ស៊ីជាមួយនឹងការងារផ្សេងៗ ហើយយើងអាចឱ្យគាត់រស់នៅក្នុងសង្គមដូចគេដូចឯងបាន។
៤-រដ្ឋបាលរាជធានីភ្នំពេញ នឹងជ្រើសរើសបងប្អូនពិការមួយចំនួន ដើម្បីមកបម្រើការងារជាមួយយើង ទៅតាមសមត្ថភាពរបស់ពួកគេ៕