សម្តេច ហ៊ុន សែន អំពាវនាវឲ្យយុវជនយុវនារីសូមចូលរួមបរិច្ចាគឈាម
សារព័ត៌មាន Cambodia News/
ភ្នំពេញ (០៤ កុម្ភៈ ២០១៦) ៖ សម្តេចអគ្គមហាសេនាបតីតេជោ ហ៊ុន សែន បានសរសេរនៅលើបណ្តាញទំនាក់ទំនងសង្គម (Facebook) Page ផ្លូវការរបស់សម្តេចបង្ហោះនៅព្រឹកថ្ងៃទី០៤ កុម្ភៈ ២០១៦មានខ្លឹមសារទំាងស្រុងដូចតទៅ៖ “ខ្ញុំសូមឆ្លៀតយកឱកាសនេះ អំពាវនាវដល់បងប្អូនប្រជាពលរដ្ឋ ជាពិសេសក្មួយៗយុវជនយុវនារីជាទីស្រឡាញ់ សូមចូលរួមបរិច្ចាគឈាមជួយសង្រ្គោះជីវិតអ្នកជំងឺ ដែលកំពុងត្រូវការឈាមចាំបាច់បំផុតនៅក្នុងប្រទេស។ ច្បាស់ណាស់ យើងពិតជាសប្បាយចិត្តនៅពេលដែលយើងអាចជួយជីវិតមនុស្សបាន តាមរយៈការផ្តល់ឈាម។
ខ្ញុំមានជំនឿថា ពលរដ្ឋគ្រប់ៗរូបអាចធ្វើបាន ជាពិសេសយុវជន ដែលគ្រាន់តែចំណាយពេល ២៥ នាទីតែប៉ុណ្ណោះ។ ការបរិច្ចាគឈាមគឺមិនប៉ះពាល់ដល់សុខភាពឡើយ។ ចំពោះរូបខ្ញុំគឺនឹងឆ្លៀតយកពេលពីការងារទៅបរិច្ចាគឈាមជួយពលរដ្ឋនៅថ្ងៃណាមួយខាងមុខនេះ ប្រសិនបើគ្រូពេទ្យដែលព្យាបាលខ្ញុំអនុញ្ញាត។
សូមបងប្អូនប្រជាពលរដ្ឋ និងយុវជនទូទាំងប្រទេសចូលរួមបរិច្ចាគឈាមជួយសង្រ្គោះជីវិតមនុស្សនៅថ្ងៃនេះទាំងអស់គ្នា! សូមអរគុណ៕”
