ក្រសួងអប់រំបញ្ជាឱ្យសាលារដ្ឋរឹតបន្តឹងបញ្ជីវត្ដមានសិស្សនៅថ្ងៃបុណ្យចូលឆ្នាំចិន
សារព័ត៌មាន Cambodia News/
ភ្នំពេញ (០៣ កុម្ភៈ ២០១៦) ៖ ក្រសួងអប់រំ យុវជន និងកីឡា បានណែនាំទៅគ្រប់គ្រឹះស្ថានអប់រំក្រោមឱវាទរបស់រដ្ឋទាំងអស់ឱ្យ រឹតបន្តឹង ការធ្វើបញ្ជីវត្តមានសិស្សឱ្យបានត្រឹមត្រូវក្នុងឱកាសបុណ្យ ចូលឆ្នាំថ្មីប្រពៃណីចិន-វៀតណាម ដែលនឹងប្រព្រឹត្ដទៅក្នុងរយៈពេល៣ថ្ងៃខាងមុខនេះ។
វិធានការ របស់ក្រសួងអប់រំនេះ ធ្វើឡើងក្នុង គោលដៅកុំឱ្យសិស្សានុសិស្សឈប់ច្រើនដែលនាំឱ្យប៉ះពាល់ដល់គុណភាពលើ វិស័យអប់រំ ហើយដោយសារតែពិធីបុណ្យនេះ វាពុំមែនជា ប្រពៃណីជាតិខ្មែរ ហើយពុំមែនជាថ្ងៃឈប់សម្រាកដែលទទួលស្គាល់ដោយរដ្ឋនោះដែរ។
លោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានពន្យល់ថា ក្នុងករណីសិស្សានុសិស្សឈប់ទាំងបីថ្ងៃក្នុងឱកាសបុណ្យចូលឆ្នាំថ្មី ប្រពៃណីចិន វៀតណាម ចាប់ពីថ្ងៃទី០៨ ដល់ថ្ងៃទី១០ ខែកុម្ភៈខាងមុខ នឹងធ្វើឱ្យសិស្សរៀនអត់ទាន់ ហើយលោកគ្រូ អ្នកគ្រូពុំអាចរម្លឹកមេរៀនឡើងវិញបានឡើយ៕ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា
