សម្ដេច ហ៊ុន សែន បង្ហាញជំនឿលើគ្រូទាយថៃដែលបានទាយពីនយោបាយខ្មែរ
សារព័ត៌មាន Cambodia News/
ភ្នំពេញ (១៨ មករា ២០១៦) ៖ សារបង្ហោះលើទំព័រហ្វ៊េសប៊ុករបស់សម្ដេច នាព្រឹកថ្ងៃចន្ទ នេះ បង្ហាញថា សម្ដេចហ៊ុន សែន ប្រមុខរដ្ឋាភិបាលកម្ពុជា បានបង្ហាញនូវជំនឿលើគ្រូទាយជនជាតិថៃ ដែលបានទស្សន៍ទាយពីស្ថានភាពនយោបាយស្រុកខ្មែរ។
សារបង្ហោះលើទំព័រហ្វ៊េសប៊ុករបស់សម្ដេច បង្ហាញថា “ខ្ញុំមិនដែលបានអាននូវអត្ថបទកាសែតថៃ ដែលចុះផ្សាយពីគ្រូទាយថៃដែលបានទាយពីនយោបាយខ្មែរនោះទេ។
ចៃដន្យ ខ្ញុំឃើញអត្ថបទនេះមុននេះ៤ថ្ងៃ ខ្ញុំឆ្លៀតអានក៏ប្រទះឃើញលើចំណុចអ្នកនយោបាយខ្លះចង់បោកខ្ញុំ តែត្រូវខ្ញុំដឹងក៏វាយបំផ្លាញចោលវិញនូវល្បិចដ៏អាក្រក់នោះ។ ត្រូវមហាសែនត្រូវលើចំណុចនេះ។”
សាររបស់សម្ដេចបានឲ្យដឹងទៀតថា “សូមផ្តាំផ្ញើទៅផងថា អ្នកបោកប្រាស់ ហ៊ុន សែន បានមិនទាន់កើតពីផ្ទៃម្តាយនៅឡើយទេ ហើយសូមកុំប្រាថ្នាបោកប្រាស់តទៅទៀត។ បើចង់លេងជាមួយ ហ៊ុន សែន គឺសុំតែការស្មោះត្រង់ប៉ុណ្ណោះ។ ខ្ញុំជូនភ្ជាប់នូវអត្ថបទជាភាសារថៃ និងភាសាខ្មែរ ដើម្បីអានទាំងអស់គ្នា រួចហើយប្រៀបធៀបជាមួយសភាពការណ៍ ដែលបាននឹងកំពុងកើតឡើងនៅកម្ពុជា”៕
