អ្នកស្លាប់ក្នុងហេតុការណ៍វាយប្រហារនៅឥណ្ឌូនេស៊ីកើនដល់ ៨នាក់
សារព័ត៌មាន Cambodia News/
ឥណ្ឌូនេស៊ី (១៨ មករា ២០១៦) ៖ មនុស្សម្នាក់ទៀតហើយបានស្លាប់បាត់បង់ជីវិត ក្រោយរងរបួសធ្ងន់ធ្ងរក្នុងហេតុការណ៍វាយប្រហារក្នុងទីក្រុងហ្សាកាតាប្រទេសឥណ្ឌូនេស៊ីកាលពីថ្ងៃទី១៤មករា ហូតមកដល់ពេលនេះ មានមនុស្ស៨នាក់ហើយបានស្លាប់។ នេះតាមការបញ្ជាក់ពីប្រព័ន្ធផ្សព្វផ្សាយកាលពីថ្ងៃអាទិត្យ ទី១៧ មករា។
ក្រៅពីអ្នកស្លាប់ ការវាយប្រហារដោយបំផ្ទុះគ្រាប់បែកនិងបាញ់ប្រហារ ដែលក្រុមរដ្ឋអ៊ីស្លាមចេញមុខទទួលខុសត្រូវនេះ ក៏បណ្ដាលឲ្យមនុស្សប្រមាណជាង៣០នាក់រងរបួស។
សូមបញ្ជាក់ថា ប៉ូលិសបានចាប់ខ្លួនជនសង្ស័យ១២នាក់ហើយក្នុងប្រតិបត្ដិការឆែកឆេរទូទាំងប្រទេសកាលពីចុងសប្ដាហ៍ ហើយបានរកឃើញភស្ដុតាងមួយចំនួន ដែលក្រុមសកម្មប្រយុទ្ធបានរៀបចំផែនការវាយប្រហារនៅតាមគោលដៅផ្សេងទៀត ដូចជានៅការិយាល័យសន្ដិសុខ និងនៅតាមទីក្រុងជាកន្លែងកំសាន្ដសម្រាប់ភ្ញៀវបរទេសជាដើម ក្នុងប្រទេសឥណ្ឌូនេស៊ី៕
