ម៉ូតូ ៧៣៦គ្រឿង ដែលរឹបអូស ត្រូវសម្តេច ស ខេង ប្រគល់ជូនប្រជាពលរដ្ឋវិញ
សារព័ត៌មាន Cambodia News/
ភ្នំពេញ ( ០៨ មករា ២០១៦) ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ បានសម្រេចប្រគល់ ម៉ូតូល្មើសច្បាប់ចរាចរណ៍ផ្លូវគោកថ្មី (គ្មានស្លាកលេខ)ចំនួន ៧៣៦គ្រឿង ជូនទៅម្ចាស់វិញ ដោយគ្រាន់ តែតម្រូវឲ្យម្ចាស់ ទៅធ្វើស្លាកលេខប៉ុណ្ណោះ ដោយ ឡែករថយន្តចំនួន ១២គ្រឿង មិនទាន់ អនុញ្ញាតប្រគល់ ជូនម្ចាស់នៅឡើយទេ។
ម៉ូតូ ៧៣៦គ្រឿងនេះ ត្រូវបានកម្លាំង នគរបាលចរាចរណ៍ រឹបអូសទុកចាប់ តាំងពីថ្ងៃទី១រហូតដល់ថ្ងៃទី៦ ខែមករា ឆ្នាំ២០១៦នេះ នៅអំឡុងពេលចុះ អនុវត្តន៍ច្បាប់ចរាចរណ៍ផ្លូវគោក ថ្មី។
ការសម្រេចរបស់ សម្តេចក្រឡាហោម ស ខេង បានធ្វើឡើងកាលពីរសៀលថ្ងៃទី៧ខែមករា ឆ្នាំ២០១៦នេះ នៅក្នុងកិច្ច ប្រជុំគណៈកម្មា ធិការជាតិសុវត្ថិភាព ចរាចរណ៍ផ្លូវគោក ដើម្បី ពិនិត្យទៅលើលទ្ធផល នៃការអនុវត្តច្បាប់ ចរាចរណ៍ផ្លូវគោកថ្មី ដែលបានអនុវត្តន៍រយៈ ពេល ៦ថ្ងៃកន្លងទៅនេះ។
យោងតាមឧត្តមសេនីយ៍ឯក គៀត ច័ន្ទថារិទ្ធ អ្នកនាំពាក្យ អគ្គស្នងការដ្ឋាន គរបាលជាតិ បានឲ្យដឹងថា ក្រៅពីការ សម្រេចឲ្យប្រគល់ម៉ូតូ គ្មានស្លាកលេខជូន ម្ចាស់វិញហើយនោះ សម្តេចក្រឡាហោម ស ខេង រួមនិងមន្ត្រីពាក់ព័ន្ធ នៅមានការពិភាក្សា ទៅលើបញ្ហាជាច្រើនទៀត បូករួមទាំងពិនិត្យទៅលើការប្រតិកម្មនានា របស់ប្រជាពលរដ្ឋ លើចំណុចមួយចំនួន ក្នុងច្បាប់ចរាចរណ៍ផ្លូវគោកថ្មី៕