មនុស្សរាប់សិបនាក់បាត់ខ្លួន ខណៈស្រឡាងដឹកអ្នកដំណើរឥណ្ឌូនេស៊ីមួយគ្រឿងបាត់ដាន
សារព័ត៌មាន Cambodia News/
ឥណ្ឌូនេស៊ី (២១ ធ្នូ ២០១៥) ៖ កាលពីថ្ងៃទី២១ ខែធ្នូ ឆ្នាំ២០១៥ ក្រុមជួយសង្គ្រោះរបស់ប្រទេសឥណ្ឌូនេស៊ីបានបន្តសកម្មភាពស្វែងរកជនរងគ្រោះដែលនៅបាត់ខ្លួនរាប់សិបនាក់ ក្រោយពីហេតុការណ៍គ្រោះថ្នាក់ស្រឡាងកំពុងបើកសុខៗ ស្រាប់តែមានបញ្ហាហើយមានការបាត់ដានតែម្តងដែលរហូតមកដល់ពេលនេះមានរយៈពេល២ថ្ងៃទៅហើយនោះ ។
ប្រភពព័ត៌មានក្នុងតំបន់បានផ្សព្វផ្សាយថា អ្នកដំណើរជិត៨០នាក់បាននិងកំពុងនៅបាត់ខ្លួន ក្រោយពីស្រឡាងដឹកអ្នកដំណើរមានបញ្ហានៅពាក់កណ្តាលទី ស្របពេលដែលមានអាកាសធាតុមិនអំណោយផលកាលពីថ្ងៃទី២០ ខែធ្នូ ឆ្នាំ២០១៥ ស្ថិតនៅតំបន់ Sulawesi ។
រហូតមកដល់ពេលនេះ មនុស្ស៣នាក់សុទ្ធតែជាពលរដ្ឋឥណ្ឌូនេស៊ីបានបាត់បង់ជីវិត ក្នុងនោះ២នាក់ជាកុមារ ។ ប៉ូលិសបានអះអាងថា មនុស្ស៣៩នាក់បានជួយសង្គ្រោះចេញពីការលិចទឹក ។ ជនរងគ្រោះខ្លះត្រូវក្រុមអ្នកនេសាទសង្គ្រោះ អ្នកខ្លះទៀតតោងរសាត់អណ្តែតតាមពោងខ្យល់រាប់ម៉ោងទម្រាំក្រុមជួយជំនួយទៅដល់ ។
អាជ្ញាធរនៅពេលនេះបានដាក់ការសង្ឃឹមថា អាចនឹងរកឃើញស្រឡាង ក៏ដូចជនរងគ្រោះទាំងអស់ ដោយសារថា នៅពេលនេះ អាកាសធាតុស្ថិតនៅតំបន់ដែលស្រឡាងបាត់ដាននោះមានភាពល្អប្រសើរវិញហើយ ៕
