អាជ្ញាធររាជធានី នឹងកាត់ទម្លាក់ខ្សែកាប្លិ៍ដែលមានភាពរញ៉េរញ៉ៃ តាមដងវិថីនានា
សារព័ត៌មាន Cambodia News
ភ្នំពេញ (០៤ ធ្នូ ២០១៥ ) ៖ នារសៀលថ្ងៃទី៣ខែធ្នូ ម្សិលមិញ នៅសាលារាជធានីភ្នំពេញមានកិច្ចប្រជុំស្ដីពីការទម្លាក់ខ្សែកាប្លិ៍អាកាស មកកប់ក្នុងដីនៅលើបណ្ដោយវិថីទាំង៥ រួមមានមហាវិថីព្រះនរោត្តម មហាវិថីកម្ពុជាក្រោម មហាវិថីសហព័ន្ធរុស្ស៊ី មហាវិថីព្រះសីហនុ និងមហាវិថីម៉ៅសេទុង ជាមួយនឹងតំណាងក្រសួង-អង្គភាព ពាក់ព័ន្ធ មន្ទីរជំនាញ អាជ្ញាធរខណ្ឌ និងក្រុមហ៊ុនពាក់ព័ន្ធ ក្រោមអធិបតីភាពលោក ប៉ា សុជាតិវង្ស អភិបាលរាជធានីភ្នំពេញ ដើម្បីស្វែងរកដំណោះស្រាយរួមល្អមួយក្នុងការអនុវត្តផែនការនេះ ។
ជាលទ្ធផលនៃកិច្ចប្រជុំគឺ៖
១.ប្រគល់ភារកិច្ចជូន លោក ឃួង ស្រេង អភិបាលរងរាជធានីភ្នំពេញ ជួបប្រជុំបន្ដជាមួយក្រុមហ៊ុនដែលមានបណ្ដាញលើអាកាស ដើម្បីជម្រុញការអនុវត្តផែនការនេះឲ្យបានជោគជ័យ។
២.គ្រប់អង្គភាព និងក្រុមហ៊ុនទាំងអស់ដែលពាក់ព័ន្ធជាមួយនឹងបណ្ដាញខ្សែកាប្លិ៍នេះ ត្រូវផ្ដល់ជា Master Plan ជូនមកសាលារាជធានីភ្នំពេញ ដើម្បីសាលារាជធានីភ្នំពេញ ដើម្បីងាយស្រួលក្នុងការគ្រប់គ្រង និងត្រូវផ្ដល់ទិន្នន័យថ្មី(Update) រៀងរាល់ឆ្នាំ។
គួរបញ្ជាក់ថា ការបើកកិច្ចប្រជុំស្ដីពីការទម្លាក់ខ្សែកាប្លិ៍អាកាស មកកប់ក្នុងដីនៅលើបណ្ដោយវិថីទាំង៥នេះ គឺបន្ទាប់ពី ការគ្រប់គ្រងមិនទាន់បានល្អរបស់អាជ្ញាធរដែលជាហេតុធ្វើឲ្យខ្សែទូរស័ព្ទ ខ្សែអ៊ិនធឺណេត ខ្សែភ្លើង ខ្សែកាប្លិ៍ទូរទស្សន៍របស់ក្រុមហ៊ុនមួយចំនួន បានអូសរាយប៉ាយគ្មានច្បាប់ទម្លាប់នៅលើបង្គោលភ្លើងរបស់អគ្គិសនីកម្ពុជា ដែលបង្កឲ្យបាត់បង់សោភ័ណភាពទីក្រុង និងអាចបង្កជាគ្រោះថ្នាក់ផ្សេងៗ ៕
