សម្តេច ហ៊ុន សែន ស្វាគមន៍ការថតរឿងនៅអង្គវត្តដែលនាំឲ្យពិភពលោកស្គាល់កម្ពុជាកាន់តែច្បាស់
សារព័ត៌មាន Cambodia News/
ភ្នំពេញ (២០ វិច្ចិកា ២០១៥) ៖ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី១៩ វិច្ចិកា ម្សិលមិញបានបង្ហោះសារនៅលើបណ្តាញសង្គមហ្វេសប៊ុកផ្លូវការ របស់សម្តេចថា “ព្រះរាជាណាចក្រកម្ពុជា សូមស្វាគមន៍ ! រឿង Lara Croft: Tomb Raider ដែលថតនៅអង្គរវត្ត សម្តែងដោយ Angelina Jolie គឺបានធ្វើអោយពិភពលោកកាន់តែស្គាល់កម្ពុជា”។
ខ្សែភាពយន្ត Tomb Raider បានចេញពីរវគ្គ១រួចមកហើយ គឺវគ្គ Lara Croft: Tomb Raider” នៅឆ្នាំ២០០១ និងវគ្គ២ Lara Croft Tomb Raider: The Cradle of Life នៅឆ្នាំ២០០៣ ដោយមាន Angelina Jolie ជាតួឯក។ Angelina Jolie ដែលជាភរិយាតារាសម្ដែង Brad Pitt បានមកថតវគ្គ១ នៃរឿងនេះនៅប្រាសាទតាព្រហ្ម ប្រទេសកម្ពុជា កាលពីឆ្នាំ២០០០ ហើយក្រោយមកក៏បានយកក្មេងប្រុសម្នាក់ពីប្រទេសកម្ពុជា គឺMaddox យកទៅចិញ្ចឹមជាកូននៅឆ្នាំ២០០២។
ជាកាកត់សម្គាល់ ភាពយន្តមួយចំនួនដែលបានមកថតនៅប្រទេសកម្ពុជាមានដូចជា៖ រឿង Lord Jim របស់ Richard Brooks (1964), រឿង អ្នកស្រែ របស់លោកប៉ាន់ ឬទ្ធី (1994), រឿង រាត្រីមួយក្រោយសង្គ្រាម របស់លោកប៉ាន់ ឬទ្ធី (1998), រឿង Lara Croft : Tomb Raider របស់លោក Simon West (2001), រឿង ទីក្រុងខ្មោច របស់លោកMatt Dillon (2003), ។
បន្ទាប់មកនៅឆ្នាំ(2004) គឺរឿង បងប្អូនពីរនាក់ របស់លោកJean-Jacques Annaud , រឿង R-Point របស់លោកSu-Chang Kong (2004), រឿង Holy Lora របស់លោកBetrand Tavernier (2004), រឿង អាណាចក្រខ្លា របស់លោកGérard Marx (2005), រឿង ក្រដាសមិនអាចខ្ចប់ភ្លើង របស់លោកប៉ាន់ ឬទ្ធី (2007), រឿង ទំនប់ការពារមហាសមុទ្រប៉ាស៊ីហ្វិក របស់លោកប៉ាន់ ឬទ្ធី (2008) និងរឿង Same same, but different របស់លោកDetlev Buck (2008)៕