ចូលរួមទប់ស្កាត់អំពើហិង្សាលើដៃគូ និងយករង្វាន់តាមហ្វេសប៊ុក
ដោយ ហេង នាង
ភ្នំពេញ (១៩ វិច្ឆិកា ២០១៥)៖ ដើម្បីលើកទឹកចិត្ត និងជម្រុញឲ្យយុវជន ដោយរួមទាំងពលរដ្ឋទូទៅផងបានចូលរួមចំណែកកាត់បន្ថយអំពើហិង្សាលើដៃគូ និងអាចឈានទៅទប់ស្កាត់បាននូវហិង្សាលើដៃគូស្និទ្ធស្នាល អង្គការវិទ្យាស្ថានបើកទូលាយ បានប្រកាសប្រគល់រង្វាន់មានដូចជាស្មាតហ្វូន (Smart phone) និងថវិកាជាដើមជូនដល់អ្នកចូលរួមក្នុងយុទ្ធនាការតាមបណ្តាញព័ត៌មានសង្គមហ្វេសប៊ុក (Facebook)។
លោកស្រី ជឹម ម៉ាណាវី នាយិកាអង្គការវិទ្យាស្ថានបើកទូលាយបានមានប្រសាសន៍ថា គម្រោង “ទប់ស្កាត់អំពើហិង្សាលើដៃគូស្និទ្ធស្នាល” តាមប្រព័ន្ធផ្សព្វផ្សាយ មានរយៈពេល៤ខែ ចាប់ពីខែកញ្ញា ដល់ខែធ្នូ ឆ្នាំ២០១៥ នេះក្រោមជំនួយឧបត្ថម្ភពីអង្គការមូនិធិអាស៊ី។ គោលបំណងរបស់គម្រោងនេះគឺដើម្បីស្វែងរកការគាំទ្រតាមបណ្តាញទូរទស្សន៍ និងបណ្តាញព័ត៌មានផ្សេងៗទៀត ដើម្បីជម្រុញឱ្យមានការកាត់បន្ថយអំពើហិង្សាលើដៃគូ។
គម្រោងនេះបានប្រើប្រាស់បណ្តាញព័ត៌មានអ័នឡាញ (Online) ពិសេសបណ្តាញសង្គមហ្វេសប៊ុក ដើម្បីឲ្យអ្នកប្រើប្រាស់បណ្តាញនេះបានចូលរួមស្វែងរកការគាំទ្រក្នុងកាត់បន្ថយអំពើហិង្សាលើដៃគូ និងទទួលបានរង្វាន់លើកទឹកចិត្ត។
នៅពេលខាងមុខនឹងមានយុទ្ធនាការ១៦ថ្ងៃដើម្បីបញ្ឈប់អំពើហិង្សាលើស្រ្តី ក្រោមការរៀបចំនិងសហការដោយអង្គការជាតិ និងអន្តរជាតិ។ ស្របពេលជាមួយគ្នា វិទ្យាស្ថានបើកទូលាយនឹងរៀបចំជាការប្រកួតមួយដែលតម្រូវឲ្យអ្នកចូលរួម ថតរូបផ្ទាល់រួមជាមួយនឹងសារអប់រំក្នុងការកាត់បន្ថយអំពើហិង្សាលើដៃគូស្និទ្ធស្នាល រួចប្ដូររូបនេះក្នុងគណនេយ្យហ្វេសប៊ុកខ្លួនឯង ហើយបើអ្នកចូលរួមណាទទួលបាន ‘ការចូលចិត្ត’ (Like) និងការបញ្ចេញមតិយោបល់ច្រើនជាងគេក្នុងការប្រកួតនឹងទទួលបានរង្វាន់ផងដែរ។
អ្នកចូលរួមក្នុងគម្រោងនេះមិនត្រឹមតែជួយបង្កើនការចាប់អារម្មណ៍ និងបង្កើនការយល់ដឹងជាសាធារណៈប៉ុណ្ណោះនោះទេ តែពួកគេក៏មានឳកាសនោះទទួលបានអាវយឺត ក្រម៉ា និងកាបូបយួរដោយឥតគិតថ្លៃផងដែរ។
ដើម្បីចួលរួមក្នុងយុទ្ធនានេះ អ្នកចូលរួមអាចចុះឈ្មោះក្នុងអ័នឡាញ https://goo.gl/nhCgT9 ឬតាមទូរស័ព្ទលេខ ០៩៥ ២២២ ៩២១ / ០៧០ ៥៦៦ ៦៥៤។ នៅលើទំព័រហ្វេសប៊ុក អ្នកចូលរួមអាចបង្ហោះ (Post) អាចចុចចែករំលែក (share ) និងអាចបញ្ចេញមតិ (Comment) ដោយសរសេរគំនិត និងយោបល់ផ្ទាល់ខ្លួនឆ្លុះបញ្ចាំងពីអំពើហិង្សាលើដៃគូស្និទ្ធស្នាល។ ក្នុងការជួយសម្រួលក្នុងយុទ្ធនាការនេះ អ្នកចូលរួមអាចស្នើចូលជាសមាជិករបស់ក្រុមជជែកក្នុងការស្វែងរកគំនិត វីដេអូថ្មីៗ និងការជួយណែនាំផ្សេងៗទៀត។