យន្តហោះរុស្ស៊ីធ្លាក់នៅអេហ្ស៊ីបទំនងដោយសារការបំផ្ទុះគ្រាប់បែក
សារព័ត៌មាន Cambodia News/
ភ្នំពេញ (០៥ វិច្ចិការ ២០១៥) ៖ តាមការស៊ើបការណ៍សម្ងាត់មួយបានបង្ហាញថា យន្តហោះរបស់រុស្ស៊ី ដែលធ្លាក់នៅក្នុងប្រទេសអេហ្ស៊ីប កាលពីសប្ដាហ៍មុនសម្លាប់មនុស្ស២២៤នាក់នោះ ទំនងធ្លាក់ដោយសារការបំផ្ទុះគ្រាប់បែក។ នេះបើតាមការបញ្ជាក់ពីអាមេរិក និងចក្រភពអង់គ្លេស។
ទោះយ៉ាងណាក៏ដោយការសន្និដ្ឋាននេះ នៅមិនទាន់បញ្ជាក់ផ្លូវការនៅឡើយទេ បើតាមរដ្ឋមន្ត្រីការបរទេសអង់គ្លេស Philip Hammond បានប្រាប់អ្នកសារព័ត៌មានថា យើងបានធ្វើការសន្និដ្ឋានរួចហើយថា លទ្ធផលគួរឱ្យកត់សម្គាល់នោះ គឺបង្កឡើងដោយសារគ្រឿងផ្ទុះនៅលើយន្តហោះ។
ពាក់ព័ន្ធនឹងបញ្ហានេះ ក្រុមជំនាញរុស្ស៊ីបានបញ្ជាក់ថា គឺវាដូចជាលឿនពេកហើយ សម្រាប់ការសន្និដ្ឋានខាងលើនេះ។ ដោយឡែក រដ្ឋមន្ត្រីការបរទេសអេហ្ស៊ីបបានច្រានចោល ចំពោះការអះអាងកន្លងមកថាការធ្លាក់យន្តហោះរុស្ស៊ី ដោយសារជាប់ពាក់ព័ន្ធនឹងរដ្ឋអ៊ីស្លាម។
គួររម្លឹកថា យន្ដហោះដឹកអ្នកដំណើររុស្ស៊ីបានធ្លាក់នៅតំបន់ភ្នំក្នុងតំបន់ស៊ីណៃប្រទេសអេហ្ស៊ីបកាលពីថ្ងៃទី៣១តុលា។ តំបន់នេះក៏ជាតំបន់ជ្រួលច្រាលផងដែរ ដោយសារកំពុងមានបញ្ហាជាមួយក្រុមសកម្មប្រយុទ្ធ៕
