ក្រសួងមហាផ្ទៃសម្រេចចាត់វិធានការពង្រឹងការពារសន្តិសុខជូនឥស្សរជននយោបាយនានា
សារព័ត៌មាន Cambodia News /
ភ្នំពេញ (០៥ វិច្ចិការ ២០១៥) ៖ យោងតាមលិខិតស្នើសុំរបស់ក្រសួងមហាផ្ទៃកាលពីថ្ងៃទី០៤វិច្ឆិកា ម្សិលមិញបានបញ្ជាក់ថា ក្រសួងមហាផ្ទៃបានសម្រេចចាត់វិធានការពង្រឹងការការពារសន្តិសុខ សណ្តាប់ធ្នាប់ និងសុវត្ថិភាពជូនប្រជាពលរដ្ឋ និងឥស្សរជននយោបាយនានា ដែលកំពុងរស់នៅ ឬបំពេញបេសកម្មការងារនៅតាមមូលដ្ឋាននានាក្នុងរាជធានី ខេត្តរបស់ខ្លួន។
ការសម្រេចចាត់វិធានការនេះ ដើម្បីជួយថែរក្សាពង្រឹងសន្តិភាព ស្ថេរភាពនយោបាយ ស្ថេរភាពសង្គម សំដៅលើកកម្ពស់ការលើកស្ទួយការគោរពសិទ្ធិមនុស្ស ការលើកកម្ពស់លទ្ធិប្រជាធិបតេយ្យ និងនីតិរដ្ឋនៅកម្ពុជា។
សូមបញ្ជាក់ថា ការសម្រេចដាក់ចេញនូវវិធានការពង្រឹងការពារសន្តិសុខនេះ ធ្វើឡើងក្រោយពីកើតមានអំពើហិង្សាលើតំណាងរាស្ត្រគណបក្សសង្គ្រោះជាតិចំនួន២រូប បណ្តាលឲ្យរងរបួសធ្ងន់ធ្ងរ និងក្រោយពីមានការស្នើពីមន្ត្រីជាន់ខ្ពស់គណបក្សសង្គ្រោះជាតិ ដែលទាមទារចង់ឲ្យមានការ ការពារសន្តិសុខ សុវត្ថិភាព ជូនដល់អ្នកតំណាងរាស្ត្រ៕
