ប៉ុនប៉ងដុតផ្ទះខណៈម្ចាស់ដេកលក់តែមិនបានសម្រេច
ភ្នំពេញ ៖ កាលពីវេលាម៉ោង២ និង១៥នាទីរំលងអធ្រាត្រ ឈានចូលថ្ងៃទី១៣ ខែមករា គេបានឮសូរសំឡេងលោកយាយម្នាក់បានស្រែកឆោឡោថា មានអ្នកប៉ុនប៉ងដុតផ្ទះរបស់គាត់ ធ្វើឱ្យប្រជាពលរដ្ឋនៅក្បែរកើតហេតុ នាំគ្នាចេញមក រួចក៏ឃាត់ខ្លួនជនសង្ស័យម្នាក់ប្រគល់ឱ្យនគរបាលប៉ុស្ដិ៍ស្រះចក។
ហេតុការណ៍នេះកើតឡើងឋិតនៅត្រង់ចំណុចផ្ទះលេខ២១៤ ផ្លូវជាតិលេខ៥ ក្រុម២១៧ ភូមិ១៧ សង្កាត់ស្រះចក ខណ្ឌដូនពេញ ម្ចាស់ផ្ទះឈ្មោះ ហេង សាវន ភេទស្រី អាយុ៣៨ឆ្នាំ មុខរបរជាងអ៊ុតសក់នៅផ្សារចាស់ ។
ប្រភពព័ត៌មានពីម្ចាស់ផ្ទះ បានឱ្យដឹងថា នៅវេលាកើតហេតុ ម្ដាយរបស់គាត់បានឃើញបុរស ម្នាក់កំពុងឈរនៅមុខផ្ទះរបស់គាត់ ដោយយកសាំងចាក់បំរុងនឹងដុត ភ្លាមនោះគាត់ក៏បានស្រែកឆោឡោឡើង បានធ្វើឱ្យប្រជាពលរដ្ឋនៅក្បែរកន្លែងកើតហេតុចេញមកព័ទ្ធខ្លួន ជនសង្ស័យម្នាក់នៅ ក្បែរកន្លែងកើតហេតុប្រគល់ឱ្យនគរបាលប៉ុស្ដិ៍ស្រះចកសាកសួរបន្ដ ។
គួរបញ្ជាក់ថាផងដែរថា ក្រោយពេលកើតហេតុសមត្ថកិច្ចចុះពិនិត្យកន្លែងកើតហេតុ បានឃើញវត្ថុតាងដែលបន្សល់ទុកមាន កាបូបស្ពាយ១ ទួឡឺវីស១ដើម ដែកកេះ១ សាំង៦ដប ក្នុងនោះចាក់អស់២ដកប៉ុនប៉ងដុងផ្ទះ ៕
ដោយ៖ ហេង នាង
