រដ្ឋមន្ត្រីក្រសួងសុខាភិបាលឲ្យបញ្ឈប់ការលេងល្បែង និងផឹកស្រាក្នុងម៉ោងធ្វើការ
សារព័ត៌មាន Cambodia News/
ភ្នំពេញ (២៧ តុលា ២០១៥) ៖ រដ្ឋមន្ត្រីក្រសួងសុខាភិបាលណែនាំទៅមន្ត្រីក្រោមឱវាទបុគ្គលិកមន្ទីរពេទ្យ ឬមណ្ឌលសុខភាពមួយចំនួនឲ្យបញ្ឈប់សកម្មភាពប្រើប្រាស់គ្រឿងស្រវឹង និងលេងល្បែងក្នុងពេលបំពេញការងារ ឬយាមប្រចាំការក្នុងមន្ទីរពេទ្យដែលធ្វើឲ្យប៉ះពាល់ដល់ប្រសិទ្ធភាពការងារ និងការផ្តល់សេវាសង្គ្រោះបន្ទាន់ដល់អ្នកជំងឺ។
ការណែនាំនេះ យោងទៅតាមលិខិតរបស់រដ្ឋមន្ត្រីក្រសួងសុខាភិបាលលោក ម៉ម ប៊ុនហេង ផ្ញើជូនប្រធានមន្ទីរសុខាភិបាលរាជធានី-ខេត្តទាំងអស់កាលពីថ្ងៃទី ២២ តុលា ឆ្នាំ២០១៥។
លិខិតបន្តថា ដោយកន្លងមកក្រសួងបានទទួលព័ត៌មានទាក់ទងនឹងមន្ត្រីរាជការផ្នែកសុខាភិបាលមួយចំនួនតូចបាននិងកំពុងប្រើប្រាស់គ្រឿងស្រវឹង លេងបៀរនៅក្នុងម៉ោងធ្វើការ ឬយាមប្រចាំការនៅមន្ទីរពេទ្យដែលជាទង្វើអាក្រក់បង្កការរាំងស្ទះដល់ការងារ និងករណីមានជំងឺត្រូវការសេវាសង្គ្រោះបន្ទាន់។
នៅក្នុងលិខិត លោក ម៉ម ប៊ុនហេង បានបញ្ជាក់ថា៖ «ករណីនេះក្រសួងសូមហាមដាច់ខាតចំពោះទង្វើមិនគប្បីនេះ។ ម្យ៉ាងទៀតយើងគួរតែទុកពេលវេលាដ៏មានតម្លៃនេះសម្រាប់ធ្វើការសិក្សាស្រាវជ្រាវបន្ថែមផ្នែកវេជ្ជសាស្ត្រតាមប្រព័ន្ធអ៊ីនធឺណិតវិញដើម្បីរួមចំណែកពង្រឹងគុណភាពសុខាភិបាល»៕
