ផ្ទុះហិង្សាពីក្រុមបាតុករ តំណាងរាស្រ្តគណបក្សសង្រ្គោះជាតិ ពីររូបរងរបួស (មានវីដេអូ)
សារព័ត៌មាន Cambodia News/
ភ្នំពេញ (២៦ តុលា ២០១៥) ៖ នៅព្រឹកថ្ងៃចន្ទនេះតំណាងរាស្រ្តគណបក្សសង្រ្គោះជាតិពីររូបបានរងរបួសបែកក្បាលនិងរថយន្តត្រូវបានវាយកម្ទេចចោល ក្រោយពីមានការផ្ទុះហិង្សាពីសំណាក់ក្រុមបាតុករដែលតវ៉ានៅមុខរដ្ឋសភា ទាមទារឲ្យដកតំណែងអនុប្រធានគណបក្សសង្រ្គោះជាតិនិងជាអនុប្រធានទី១នៃរដ្ឋសភា។
ប្រជាពលរដ្ឋរាជធានីភ្នំពេញរាប់ពាន់នាក់ បានធ្វើបាតុកម្មនិងដាក់ញតិទៅកាន់រដ្ឋសភា ដើម្បីឲ្យដកតំណែង លោក កឹម សុខា ដោយពួកគាត់ចោទប្រកាន់ថាលោក កឹម សុខា ជា”មនុស្សបោកប្រាស់ ក្រឡេចក្រឡុក និងជាអ្នកដែលនាំទុក្ខដល់ប្រជាពលរដ្ឋ”។
លោក ញ៉យ ចំរើន តំណាងរាស្រ្តគណបក្សសង្រ្គោះជាតិ ដែលរងរបួសបែកក្បាល បានអះអាងថា នៅម៉ោងជិត១២ថ្ងៃត្រង់ ពេលលោកនិងតំណាងរាស្រ្តមួយរូបទៀត គឺលោក គង់ សភា ចេញពីប្រជុំសភាតាមទ្វារក្រោយ ស្រាប់តែលោកថាមានហិង្សាកើតឡើង។
គួរបញ្ជាក់ថា លោក ញ៉យ ចំរើន ជាតំណាងរាស្រ្តបក្សសង្រ្គោះជាតិមណ្ឌលកំពង់ចាម ចំណែកលោក គង់ សភា ជាតំណាងរាស្រ្តបក្សសង្រ្គោះជាតិមណ្ឌលស្វាយរៀង៕
