ចាប់ពីថ្ងៃទី៩ ដល់ថ្ងៃទី១៥ កក្កដា មានភ្លៀងច្រើនថ្ងៃ ពីមធ្យម ទៅច្រើន
សារព័ត៌មាន Cambodia News/
ភ្នំពេញ (១០ កក្កដា ២០១៥) ៖ ក្រសួងធនធានទឹក និងឧតុនិយម បានសេចក្តីជូនដំណឹងជាសាធារណ នៅថ្ងៃទី៩ ខែកក្កដា ឆ្នាំ២០១៥ ថា បច្ចប្បន្ន កម្ពុជា កំពុងទទួលរងឥទ្ធិពលខ្យល់មូសុងនិរតី និងឥទ្ធិពលប្រព័ន្ធសម្ពាធទាប (ITCZ) ដែលបានកំពុងអូសបន្លាយកាត់លើភាគខាងត្បូងប្រទេសឡាវ និងអាងទន្លេមេគង្គក្នុងប្រទេសថៃ និងប្រទេសឡាវ។
នៅក្នុងសេចក្តីជូនដំណឹង បានបញ្ជាក់ថា ឥទ្ធិពលបាតុភូតធម្មជាតិខាងលើនេះ នឹងធ្វើឲ្យអាកាសធាតុ នៅព្រះរាជាណាចក្រកម្ពុជា ចាប់ពីថ្ងៃទី៩ ដល់ថ្ងៃទី១៥ ខែកក្កដា ឆ្នាំ២០១៥ នៅតំបន់ខ្ពង់រាបភាគខាងជើង និងតំបន់ខ្ពងរាបភាគឦសាន រួមមាន ខេត្តឧត្រមានជ័យ ព្រះវិហារ ស្ទឹងត្រែង ក្រចេះ រតនគីរី មណ្ឌលគីរី មានភ្លៀងធ្លាក់ពីបង្គួរទៅច្រើន។
តំបន់ទំនាបកណ្តាល រួមមាន ខេត្តសៀមរាប កំពង់ធំ កំពង់ចាម ព្រៃវែង មានភ្លៀងពីមធ្យមទៅបង្គួរ។ តំបន់មាត់សមុទ្រ រួមមានខេត្ត កោះកុង កំពត កែបនិងខេត្តព្រះសីហនុ មានភ្លៀងពីមធ្យមទៅច្រើន។ លើផ្ទៃសមុទ្រ មានខ្យល់បក់បោក និងរលកខ្លាំង។ រលកសមុទ្រមានកម្ពស់ ពីមួយម៉ែត្រទីពីរម៉ែត្រ។
យោងលើស្ថានភាពអាកាសធាតុខាងលើ ក្រសួងធនធានទឹក បានធ្វើការអំពាវនាវជាពិសេសចំពោះបងប្អូនប្រជានេសាទសមុទ្រ និងអ្នកធ្វើដំណើរតាមសមុទ្រឲ្យបង្កើនការយកចិត្តទុកដាក់ខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចនឹងកើតមានឡើងជាយថាហេតុ៕
