ឪពុកថយឡានកិនកូនស្រីអាយុ២ឆ្នាំ ស្លាប់
សារព័ត៌មាន Cambodia News/
ភ្នំពេញ (៣០ ឧសភា ២០១៥) ៖ កាលពីថ្ងៃទី២៩ ខែឧសភា ក្មេងស្រីអាយុ ទើបតែបានពីរឆ្នាំម្នាក់ ត្រូវស្លាប់យ៉ាងអាណោចអាធ័ម ដោយសារ ឪពុកបង្កើតបើករថយន្តថយក្រោយមិនបាន មើលក្រោយបណ្ដាល ឲ្យកិនកូនស្រីខ្លួនឯងធ្លាយខួរគ្រាដែល កូនស្រីកំពុងរត់លេងនៅក្បែរមាត់ទ្វាររបងផ្ទះនៅផ្លូវលំក្រុមទី៣ ភូមិជង្រុក សង្កាត់ត្រពាំង ខណ្ឌពោធិ៍សែនជ័យ ។
ក្មេងស្រីរងគ្រោះឈ្មោះ សៀន គឹមហៃ អាយុ២ឆ្នាំ ម្តាយឈ្មោះ ស៊ិន សុឃី អាយុ៣៦ឆ្នាំឪពុកឈ្មោះ ម៉ន សាន អាយុ៣៧ឆ្នាំ មុខរបរចាក់លូ និងចាក់សសរបេតុង មានទីលំនៅកន្លែងកើតហេតុខាងលើ។
មុនពេលកើតហេតុ បុរសជាឪពុកក៏បានថយឡានចេញពីផ្ទះ(ជាប្រភេទឡានស្ទូច)ដោយ មិនបានដឹងថា កូនស្រីតូចរបស់ខ្លួនកំពុងរត់លេងនៅមុខទ្វារបងផ្ទះនោះទេ លុះរថយន្តមកដល់មាត់ទ្វារក៏បានកិនកូនស្រីខ្លួន ឯងបណ្តាលឲ្យធ្លាយខួរស្លាប់ ភ្លាមៗនៅនឹងកន្លែងកើតហេតុគួរឲ្យអាណោចអធ័ម ។
ពេលដឹងថា បើករថយន្តបុកកិនកូនស្លាប់ ឪពុករូបនេះលោតចុះពីលើរថយន្តទៅស្រវារឧិបកូនស្រីជាមួយប្រពន្ធ ស្រែកយំរហូតសន្លប់ និងមានវិប្បដិសារីយ៉ាងខ្លាំងមិនគួរកើតហេតុតែ មួយប៉ព្រិចភ្នែកបាត់បង់កូនម្នាក់បែបបនេះឡើយ ៕
