ក្លឹបអ្នកកាសែតកម្ពុជា រៀបចំបោះឆ្នោតជ្រើសរើសប្រធានថ្មី នៅថ្ងៃ២៨មេសា
នាង/សារព័ត៌មាន Cambodia News/
ភ្នំពេញ (២០ មេសា ២០១៥) ៖ នៅថ្ងៃទី២០មេសានេះ ក្លឹបអ្នកកាសែតកម្ពុជា ក.អ.ក បានប្រកាសថា ដោយអាណត្តិទី៤ នៃគណៈកម្មាធិការនាយក នឹងត្រូវបញ្ចប់ដូច្នេះ ក.អ.ក នឹងធ្វើការរៀបចំការបោះឆ្នោតជ្រើសរើសគណៈកម្មាធិការនាយក និងប្រធាន ក.អ.ក សម្រាប់អាណត្តិទី៥ នៅថ្ងៃទី២៨ ខែមេសា ឆ្នាំ២០១៥ ខាងមុខនេះ។ [ អានបន្ត ]
សេចក្តីជូនដំណឹងដដែល លើកឡើងថា ក.អ.ក សូមជម្រាបថា យោងទៅតាមលក្ខន្តិកៈ និងបទបញ្ជាផ្ទៃក្នុង ក.អ.ក សមាជិកស្ថាបនិកមានសិទ្ធិឈរឈ្មោះដោយស្វ័យប្រវត្តិ សម្រាប់ការបោះឆ្នោតជ្រើសរើសគណៈកម្មាធិការនាយក ខណៈដែលសមាជិកសកម្ម ដែលមានបំណងឈរឈ្មោះ ចាំបាច់ត្រូវមានញត្តិគាំទ្រដោយសមាជិកសកម្មមួយភាគបី ក្នុងចំណោមសមាជិកសរុប (យោងតាមបញ្ញតិ្តទីV ចំណុចទី V-3 ថ្មីនៃបទបញ្ជាផ្ទៃក្នុង)។
សេចក្តីជូនដំណឹងដដែល គូសបញ្ជាក់ថា “សូមសមាជិកស្ថាបនិក និងសមាជិកសកម្ម ដែលមានបំណងឈរឈ្មោះសម្រាប់ការបោះឆ្នោតខាងលើនេះសូមមេត្តាមកចុះឈ្មោះ ឬផ្តល់ព័ត៌មាន មកទីស្នាក់ការ ក.អ.ក ដោយភ្ជាប់ជាមួយនូវបញ្ជីឈ្មោះអ្នកគាំទ្រ (សម្រាប់សមាជិកសកម្ម) អោយបានមុនថ្ងៃទី២៧ ខែមេសា ឆ្នាំ២០១៥ ជាកំណត់”។
គួរបញ្ជាក់ផងដែរថា ការបោះឆ្នោតជ្រើសប្រធានថ្មីនោះ នឹងធ្វើឡើង ក្រោយពីលោកប៉ែនសមិទ្ធិ និពន្ធនាយកកាសែតរស្មីកម្ពុជា និងជាប្រធានក្លឹប អ្នកកាសែតកម្ពុជា បានទទួលមរណភាព កាលពីថ្ងៃទី៣០មីនា ឆ្នាំ២០១៥ ដោយរោគាពាធ៕
