រដ្ឋាភិបាលសុខចិត្តចំណាយលុយដើម្បីបញ្ជៀសបាតុកម្មជាថ្មីរបស់អ្នកផលិតជ័រកៅស៊ូ
នៅទីបំផុតទៅ សហគមន៍អ្នកផលិតជ័រកៅស៊ូថៃបានយល់ព្រមតាមសំណើរបស់រាជរដ្ឋាភិបាលថៃ ដែលបានសម្រេច កាលពីថ្ងៃអង្គារ យល់ព្រមផ្គត់ផ្គង់ថវិកាដល់អ្នកផលិតជ័រកៅស៊ូ។ ការយល់ព្រមព្រៀងគ្នារវាងរាជរដ្ឋាភិបាល និងសហគមន៍អ្នកផលិតជ័រកៅស៊ូធ្វើឲ្យគេជៀសផុតពីបាតុកម្មតវ៉ាជាថ្មី របស់អ្នកផលិតជ័រកៅស៊ូថៃ ដែលគេគ្រោងធ្វើនៅថ្ងៃសៅរ៍ចុងសប្តាហ៍នេះ។
តាមអ្នកនាំពាក្យ របស់អនុរដ្ឋមន្រ្តីថៃ សុនីសា លឺតប៉ាកាវ៉ាត រដ្ឋាភិបាលបានសម្រេចផ្តល់កញ្ចប់ថវិកាប្រមាណ៦៦០លានដុល្លារដើម្បី ជួយផ្គត់ផ្គង់វិស័យផលិតជ័រកៅស៊ូ។ ថវិកាជំនួយធ្វើឡើងក្នុងរូបភាពដំឡើងថ្លៃទ្វេសម្រាប់អាជីវកម្មផលិត ជ័រកៅស៊ូ។ ការសម្រេចនេះធ្វើឡើង នៅមុនគម្រោងបាតុកម្មជាថ្មីរបស់សហគមន៍អ្នកផលិតជ័រកៅស៊ូ នៅចុងសប្តាហ៍នេះ។ បាតុកម្មដែលរាជរដ្ឋាភិបាលថៃវាយតម្លៃថា នឹងប៉ះពាល់ធ្ងន់ធ្ងរដល់សេដ្ឋកិច្ចថៃ។
ប្រទេសថៃជាប់ឈ្មោះជាប្រទេសធំមួយ នៅក្នុងពិភពលោក ក្នុងការនាំចេញជ័រកៅស៊ូធម្មជាតិ។ ប៉ុន្តែ តម្លៃធ្លាក់ថ្លៃរបស់ជ័រកៅស៊ូ ចាប់តាំងពីឆ្នាំ ២០១១បានធ្វើឲ្យក្រុមអ្នកផលិតជ័រកៅស៊ូថៃ ក្នុងខេត្តចំនួន១៥ ក្តៅក្រហាយ និងធ្វើបាតុកម្ម ចាប់តាំងពី បីសប្តាហ៍មកហើយ។ ពួកគេបានបិទផ្លូវ រារាំងចរាចរណ៍រទេះភ្លើង និងបានចូលបិទអាកាសយានដ្ឋាននៅខេត្តភាគខាងត្បូងមួយរយៈ។
កាសម្រេចផ្តល់ជំនួយជាង៦០០លានដុល្លារ បានធ្វើឲ្យសហគមន៍អ្នកផលិតជ័រកៅស៊ូក្នុងខេត្តទាំង១៥យល់ ព្រមផ្អាក មិនធ្វើបាតុកម្មដែលពួកគេបានគ្រោងថា នឹងធ្វើនៅថ្ងៃសៅរ៍ខាងមុខ។ ពួកគេតឿនរំលឹកផងដែរដល់រដ្ឋាភិបាលឲ្យប្រញាប់ប្រគល់ថវិកា និងបញ្ជូនអ្នកតំណាងទៅភាគខាងត្បូងដើម្បីចុះកិច្ចព្រមព្រៀងជា ផ្លូវការមួយ ដែលយ៉ាងយូរបំផុតត្រូវធ្វើនៅថ្ងៃសុក្រ ចុងសប្តាហ៍នេះ។
សូមរំលឹកថា កាលពីសប្តាហ៍មុន ក្រុមប្រជាជនដែលពោរពេញដោយកំហឹងក្នុងខ្លួន បានវាយតបត រហូតធ្វើឲ្យប៉ូលិសថៃរបួសជាង១០ នាក់ និងក្រោយមកមេដឹកនាំបាតុករ ១១នាក់ត្រូវបានចាប់ខ្លួន។ កសិករផលិតជ័រកៅស៊ូមានក្តីក្រេវក្រោធដែលរដ្ឋាភិបាលព្រងើយកន្តើយលើ អាជីវកម្មជ័រកៅស៊ូ។ ពួកគេបានចោទរាជរដ្ឋាភិបាលរបស់លោកស្រីយីងឡាក់ថា បានយកចិត្តទុកដាក់តែទៅលើអ្នកផលិតស្រូវអង្ករ ដោយបានធ្វើនយោបាយទិញអង្ករក្នុងតម្លៃខ្ពស់ពីប្រជាកសិករ ដែលតាមពិតជាអ្នកគាំទ្រគណបក្សកាន់អំណាច៕ដោយ ឈាង បុប្ផា (RFI)
