សប្ដាហ៍នេះ សភាសហរដ្ឋអាម៉េរិកនឹងពិចារណាពីវិធានការយោធាទៅកាន់ប្រទេសស៊ីរី
លោក Barack Obama ប្រធានាធិបតីសហរដ្ឋអាម៉េរិកកំពុងរៀបចំសម្រាប់ការសម្ភាសន៍តាម ទូរទស្សន៍ជាតិចំនួន ៦ ក្នុងកិច្ចព្យាយាមមួយដើម្បីបញ្ចុះបញ្ចូលសាធារណជនដែលនៅសង្ស័យពី ភាពចាំបាច់នៃការចាត់វិធានការយោធាទៅលើប្រទេសស៊ីរី នៅមុនពេលដែលលោកនឹងថ្លែងសុន្ទរកថាទៅកាន់ប្រជាពលរដ្ឋនៅទូទាំង ប្រទេសនៅថ្ងៃអង្គារស្អែកនេះ។
លោក ប្រធានាធិបតីសហរដ្ឋអាម៉េរិក បានស្នើដល់សភាសហរដ្ឋអាម៉េរិកឲ្យគាំទ្រចំពោះការវាយប្រហារដោយមាន កម្រិតមួយទៅលើរដ្ឋាភិបាលប្រទេសស៊ីរី ហើយនៅក្នុងសប្ដាហ៍នេះសភាជាន់ទាបសហរដ្ឋអាម៉េរិកនឹងលើកយកបញ្ហា នេះមកពិភាក្សា។
តាមរយៈការ ស្ទាបស្ទង់មតិដែលមានមកទល់នឹងពេលនេះបង្ហាញថា លោកប្រធានាធិបតី Obama នឹងមិនបានទទួលការគាំទ្រពីសភាទេ លុះត្រាតែលោកប្រធានាធិបតីអាចបញ្ចុះបញ្ចូលសមាជិកសភាខាងបក្ស ប្រជាធិបតេយ្យដែលប្រឆាំងនឹងការធ្វើសង្គ្រាម ឬក៏សមាជិកខាងបក្សសាធារណរដ្ឋមួយចំនួនដែលដែលមិនទាន់មានការ ជឿជាក់នោះ ឲ្យមកគាំទ្រលោក។
លោក Denis McDonough ប្រធានខុទ្ទការល័យសេតវិមានបានមានវត្តមាននៅក្នុងកម្មវិធីផ្សាយ សន្ទនាថ្ងៃអាទិត្យចំនួន៥ ដោយលោកបានមានប្រសាសន៍ថា សំណួរសម្រាប់សភានៅក្នុងសប្ដាហ៍នេះគឺជាសំណួរដ៏សាមញ្ញមួយថា តើគួរមានផលវិបាកអ្វីខ្លះដល់អ្នកដែលបានប្រើប្រាស់ឧស្ម័ន, អាវុធគីមី ដើម្បីសម្លាប់ពលរដ្ឋរបស់ខ្លួនជាង១ពាន់នាក់ ដោយរួមបញ្ចូលទាំងកុមារមិនតិចជាង ៤០០រូបនោះ? លោកក៏បានដាក់សំណួរនេះផងដែរទៅកាន់ពលរដ្ឋអាម៉េរិក និងលោកប្រធានាធិបតីស៊ីរី Bashar Al Assad។ នៅក្នុងបទសម្ភាសន៍ជាមួយទូរទស្សន៍អាម៉េរិក PBS លោក Assad បានឲ្យតម្រុយថា លោកនឹងធ្វើការតបតវិញក្នុងករណីដែលមានការវាយប្រហារពីសំណាក់ សហរដ្ឋអាម៉េរិកនោះ៕ (Radio Australia)
