យន្តហោះក្រុមហ៊ុនអាកាសចរណ៍ GERMANWING ធ្លាក់នៅបារាំង
ប្រែសម្រួលដោយ៖ សារព័ត៌មានយុវវ័យថ្មី/
បារាំង (២៥ មីនា ២០១៥) ៖ យោងតាមភ្នាក់ងារសារព័ត៌មាន Reuters ចេញផ្សាយកាលពីថ្ងៃទី២៤ ខែមីនា បានឲ្យដឹងថា យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Germanwings ប្រភេទ Airbus A320 ជើងហោះហើរ 4U9525 បានធ្វើដំណើរពីទីក្រុង Barcelona ប្រទេស អេស្ប៉ាញ ទៅកាន់ ទីក្រុង Duesseldorf ប្រទេសអាល្លឺម៉ង់ បានធ្លាក់ក្នុងតំបន់ Alpes de Haute Provence ភាគខាងត្បូងប្រទេស បារាំង ដែលជាតំបន់ដាច់ស្រយាលមួយ កំពុងប្រឈមមុខនឹងការធ្លាក់ព្រិលថែមទៀតផង។
អាជ្ញាធរបារាំងបានបញ្ជាក់ថា យន្តហោះបានធ្លាក់នៅតំបន់ដែលមានព្រិលធ្លាក់យ៉ាងក្រាស និងអាកាសធាតុត្រជាក់បំផុត ដែលនេះជាបញ្ហាមួយបង្កការស្មុគស្មាញ និងការលំបាកយ៉ាងខ្លាំងក្នុងកិច្ចការស្រាវជ្រាវ និងជួយសង្គ្រោះ។
រហូតមកទល់ពេលនេះ មិនទាន់មានប្រភពណាមួយបញ្ជាក់ច្បាស់នៅឡើយទេ ទាក់ទិននឹងមូលហេតុនៃការធ្លាក់យន្តហោះ ប៉ុន្តែអ្វីដែលអាចដឹងបាននោះគឺ មិនមានអ្នកណាម្នាក់នៅរស់នោះទេ។ នេះជាការលើកឡើងរបស់លោក Francois Hollande ប្រធានាធិបតីប្រទេស បារាំង៕
