ភរិយានាយករដ្ឋមន្រ្តីកម្ពុជាត្រៀមស្វាគមន៍ដំណើរទស្សនកិច្ចភរិយាលោកអូបាម៉ា
សារព័ត៌មាន Cambodia News /
អត្ថបទ៖ ហេង នាង/
ភ្នំពេញ (១៨ មីនា ២០១៥) ៖ តាមសេចក្ដីជូនព័ត៌មានរបស់ ក្រសួងការបរទេសចុះថ្ងៃទី ១៧ ខែមីនា បានឲ្យដឹងថា ក្នុងដំណើរទស្សនកិច្ច នៅព្រះរាជាណាចក្រកម្ពុជា ចាប់ពីថ្ងៃទី២០ ដល់ ថ្ងៃទី ២២ ខែមីនា របស់លោកស្រីមីស្ហ៊ែល អូបាម៉ា ខាងមុខនេះ នឹងត្រូវទទួលបានការស្វាគមន៍យ៉ាងកក់ក្ដៅពីសំណាក់ ភរិយារបស់លោកនាយករដ្ឋមន្ត្រីហ៊ុន សែន ដែលជាប្រធានកាកបាទក្រហមកម្ពុជា។
ជាមួយគ្នានោះ ភរិយាទាំងពីរ របស់នាយករដ្ឋមន្ត្រីកម្ពុជា និងប្រធានាធិបតីសហរដ្ឋអាមេរិកនឹងជួបពិភាក្សាទ្វេភាគី នៅវិទ្យាល័យ ហ៊ុន សែន បាគង ក្នុងទឹកដីខេត្តសៀមរាប ហើយបន្ទាប់មក ជួបសំណេះសំណាលជាមួយសិស្សនារីចំនួន១០ នាក់ ដើម្បីគាំទ្រវិស័យអប់រំយុវនារីនៅកម្ពុជា។
គួរបញ្ជាក់ថា អំឡុងពេលទស្សនកិច្ចមកកម្ពុជានេះ ខណៈដែលលោកស្រី មីស្ហ៊ែល អូបាម៉ា ស្នាក់នៅខេត្តសៀមរាប លោកស្រី ក៏នឹងអញ្ជើញទៅទស្សនាប្រាសាទអង្គរវត្តផងដែរ៕
