សម្តេចតេជោ បានប្រកាសថា មានសារព័ត៌មាន៣ប្រភេទមិនគួរឱ្យមានវត្តមាននៅកម្ពុជា
សារព័ត៌មាន Cambodia News/
ភ្នំពេញ (២២ មករា ២០១៨) ៖ ថ្លែងនៅក្នុងពិធីជួបសំណេះសំណាលជាមួយនឹងអ្នកសារព័ត៌មាន ជាលើកទី២នៅឯមហាសន្និបាតកោះពេជ្រ កាលពីម្សិលមិញ ២១ មករា ២០១៨ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា នៅកម្ពុជាមានសារព័ត៌មាន ៣ប្រភេទ ដែលមិនគួរឱ្យមានវត្តមាននៅក្នុងប្រទេសនេះឡើយ។
សម្តេច ហ៊ុន សែន បានពន្យល់ថា សារព័ត៌មានទាំង៣ប្រភេទនោះ រួមមាន៖ ទី១៖ គឺសារព័ត៌មានដែលបានតាំងខ្លួនជាប្រភេទក្រុមម៉ាហ្វីយ៉ា ដែលដែរជម្រិតទារប្រាក់ពី អ្នកដទៃជាថ្នូរ នឹងការចេញផ្សាយ បើគេមិនឱ្យផ្សាយអាក្រក់ពីគេ ជាពិសេសពាក់ព័ន្ធនឹងបទល្មើសព្រៃឈើ។
ទី២៖ គឺសារព័ត៌មានបានបើកដោយមិនមានច្បាប់ ហើយមិនបានបង់ពន្ធ ដែលកន្លងមកការបិទសារព័ត៌មាន មិនគោរពច្បាប់នៅកម្ពុជានេះ ត្រូវបានគេយកទៅផ្សាយថាសារព័ត៌មាននោះគឺជាជនរងគ្រោះទៅវិញ និងទី៣៖ គឺជាប្រភេទសារព័ត៌មានតែឈ្មោះ ប៉ុន្តែមិនដែលមានសកម្មភាព មិនដែលចេញផ្សាយ នៅពេលដែលពួកគេប្រព្រឹត្តល្មើសច្បាប់ បែរជាយកឈ្មោះសារព័ត៌មាននោះមកសំអាងទៅវិញ៕
