នាយករដ្ឋមន្ត្រីថៃប្រតិកម្មចំពោះការរិះគន់របស់ក្រុមសិទ្ធិមនុស្សអន្តរជាតិ
សារព័ត៌មាន Cambodia News/
អន្តរជាតិ (២៧ ខែវិច្ចិកា ២០១៤) ៖នាយករដ្ឋមន្ត្រីថៃលោក ប្រាយុទ្ធ ច័ន្ទអូចា ដែលឡើងកាន់អំណាចតាមរយៈការធ្វើរដ្ឋប្រហារ បានថ្លែងការពារតួនាទីរបស់លោកជានាយករដ្ឋមន្ត្រី ដែលជាប្រតិកម្មឆ្លើយតបនឹងការរិះគន់ របស់ក្រុមអង្គការសិទ្ធិមនុស្សអន្តរជាតិ ជុំវិញការដឹកនាំរបស់លោករយៈពេលជាង៦ខែមកនេះ។
ប្រតិកម្មរបស់លោក ប្រាយុទ្ធ បានធ្វើឡើងនៅថ្ងៃពុធ ទី២៦ ខែវិច្ឆិកា ជាការឆ្លើយតប ទៅនឹងអង្គការសិទ្ធិមនុស្សអាមេរិក Human Rights Watch ដែលបានចេញសេចក្ដីថ្លែងការណ៍ កាលពីសប្ដាហ៍មុននេះ ដោយ រិះគន់ថា ការដឹកនាំ របស់ក្រុមប្រឹក្សាយោធាថៃ ចាប់តាំងពីថ្ងៃរដ្ឋប្រហារ ថ្ងៃទី២២ ខែឧសភា គ្មានអ្វីក្រៅពីការចាប់ខ្លួនក្រុមអ្នករិះគន់ អ្នកនយោបាយ និងបំបិទសេរីភាព ប្រព័ន្ធផ្សព្វផ្សាយនោះទេ ហើយក៏គ្មានធ្វើឲ្យប្រព័ន្ធប្រជាធិបតេយ្យរីកចម្រើនអ្វីដែរ ។
លោកប្រាយុទ្ធបានប្រាប់អ្នកសារព័ត៌មានថា លោកមិនបានរឹបអូសអំណាច ដោយសារតែផលប្រយោជន៍ផ្ទាល់ខ្លួនលោក ឬគ្រួសារលោក នោះទេ ។ លោកបន្តថា លោកមិនចង់រំលោភអំណាច ហើយក៏មិនចង់ប្រើកងទ័ពអ្វីដែរ ហើយថា តួនាទីរបស់លោកមិនបំផ្លាញផលប្រយោជន៍ជាតិដែរ ។
គួរបញ្ជាក់ថា ប្រទេសថៃ ត្រូវបានមើលឃើញថាកំពុងឆ្លងកាត់របត់ថ្មីមួយ ជាមួយនឹងការតស៊ូដើម្បី រើខ្លួនចេញពីការគ្រប់គ្រងរបស់ក្រុមប្រឹក្សាយោធា ដែលលោកប្រាយុទ្ធជាមេដឹកនាំ ៕
