វៀតណាម ជំទាស់ការ សាងសង់ ព្រលានយន្តហោះ ដោយចិន នៅកោះជម្លោះ
សារព័ត៌មាន Cambodia News/
ហាណូយ (១០ តុលា ២០១៤) ៖ ប្រទេសវៀតណាម នៅថ្ងៃព្រហស្បតិ៍ ទី០៩ ខែតុលា ឆ្នាំ២០១៤ បានចេញសេចក្តី ថ្លែងការណ៍ ជំទាស់ទៅនឹងការសាងសង់ ព្រលានយន្តហោះប្រវែង ២ គីឡូម៉ែត្រនៅកោះ វូឌី ដែលជាកោះមួយធំបំផុតក្នុងប្រជុំកោះ ផារ៉ាសែល ដោយវៀតណាមអះអាងថា សកម្មភាព របស់ចិននេះ គឺជាការរំលោភយ៉ាងធ្ងន់ធ្ងរទៅលើអធិបតេយ្យភាពរបស់វៀតណាម, នេះបើតាមការដកស្រង់ សេចក្តីថ្លែងការណ៍ពីសារព័ត៌មានរដ្ឋវៀតណាម។
ទីភ្នាក់ងារព័ត៌មានជប៉ុន ក្យូដូ ចេញផ្សាយនៅថ្ងៃសុក្រ ទី១០ ខែតុលា នេះដោយលើកឡើងពី សម្តីអ្នកនាំពាក្យក្រសួងការបរទេសវៀតណាម ឡេ ហៃប៊ិញ ថា “វាបានរំលោភទៅនឹងច្បាប់ អន្តរជាតិ និង ស្ថានការណ៍ដែលកំពុងស្មុគស្មាញជាច្រើនទៀត នៅសមុទ្រចិនខាងត្បូង ដែល ជាការប៉ះទង្គិចដល់ការអភិវឌ្ឍនៃទំនាក់ទំនងទ្វេភាគី។”
គួរបញ្ជាក់ថាប្រជុំកោះ ផារ៉ាសែល ដែលស្ថិតនៅក្នុងដែនសមុទ្រចិនខាងត្បូងនេះ បានស្ថិត នៅក្នុងការគ្រប់គ្រងរបស់ចិន តែវៀតណាមក៏បានអះអាងពីអធិបតេយ្យរបស់ខ្លួនផងដែរ ដោយយោងទៅលើសន្ធិសញ្ញាដែនសមុទ្រកាលពីទសវត្សរ៍ ១៩៨០ ដែលចែងអំពីបរិបទអ្វីខ្លះ ដែលប្រទេសមួយអាចមានសិទ្ធិនៅលើអធិបតេយ្យផ្ទៃសមុទ្រនោះ។ ចំពោះកោះផារ៉ាសែល នេះមានទីតាំង ស្ថិតនៅជិតខេត្ត ហាយណាំ របស់ចិន និង ខេត្តដាណាង របស់វៀតណាម៕
