លោកនាយករដ្ឋមន្ត្រី ហ៊ុន សែន ក្លាយជាមនុស្សគំរូសម្រាប់អ្នកជក់បារី
សារព័ត៌មាន Cambodia News/
ភ្នំពេញ (២៦ កញ្ញា ២០១៤) ៖ ក្នុងពិធីចែកសញ្ញាបត្រដល់និស្សិតសាកលវិទ្យាចំរើនពហុបច្ចេកវិទ្យានៅកោះពេជ្រ កាលពីថ្ងៃព្រហស្បតិ៍ ម្សិលមិញ លោកនាយករដ្ឋមន្ត្រី ហ៊ុន សែន បានប្រកាសថា លោកអាចផ្តាច់ការជក់បារីបានហើយ ក្រោយពីមានការទទូចពីក្រុមគ្រួសារ។
លោកនាយករដ្ឋមន្ត្រី ថ្លែងថា លោកធ្លាប់បានសន្យាជាមួយគ្រួសារកាលពី១៤ឆ្នាំមុនថា លោកនឹងឈប់ជក់បារី នៅពេលដែលលោកមានចៅពរ។ប៉ុន្តែលោកថាការសន្យានោះមិនអាចធ្វើបាននៅពេលនោះទេ។លោកនាយករដ្ឋមន្ត្រីបន្តថា នៅថ្ងៃនេះលោកប្រកាសជាផ្លូវការថាលោកអាចឈប់ជក់បារីបានជាស្ថាពរហើយ។
លោក ហ៊ុន សែន បន្តថា រហូតមកដល់ពេលនេះលោកធុំក្លិនបារីមិនបានទេពេលចេញមកខាងក្រៅផ្ទះ ហើយ លោកអាណិតភរិយា និងគ្រួសារដែលពីមុនតែងតែនៅជាមួយអ្នកជក់បារី។លោក បានឲ្យដឹងទៀតថា លោកមិនបានប្រើសារជាតិជំនួយអ្វីនោះទេ គឺសំខាន់ការតស៊ូ តែម្តង៕
