កិច្ចចរចាលើសំណើរបញ្ចូល UN ជាអាជ្ញាកណ្តាល កំពុងដំណើរការ
ភ្នំពេញ៖ មន្ត្រីជាន់ខ្ពស់ គណបក្សសង្គ្រោះជាតិ អះអាងថា ខ្លួនកំពុងបន្តចរចាជាមួយគណៈកម្មាធិការជាតិរៀបចំការបោះឆ្នោត និងគណបក្សប្រជាជនកម្ពុជា ចំពោះសំណើរទាមទារសមាសភាពអង្គការសហប្រជាជាតិ ជាអាជ្ញាកណ្តាល ក្នុងគណៈកម្មការចម្រុះត្រួតពិនិត្យភាពមិនប្រក្រតីនៃការបោះឆ្នោត។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យដឹងថា គណបក្សសង្គ្រោះជាតិ នឹងទុកពេលឲ្យ គ.ជ.ប និងគណបក្សប្រជាជនកម្ពុជា ពិចារណារឿងនេះ។ លោក អះអាងថា យុត្តិធម៌នឹងមិនអាចមានឡើយ ប្រសិនបើទុកឲ្យ គ.ជ.ប និង គណបក្សប្រជាជនកម្ពុជា ជាអ្នកដោះស្រាយបញ្ហានេះនោះ។
អគ្គលេខាធិការ គ.ជ.ប លោក ទេព នីថា អះអាងថា មិនមានការប្រជុំជាថ្មីលើសំណើរនេះឡើយ ដោយហេតុថា គណបក្សសង្គ្រោះជាតិ បានបដិ សេធចូលរួមកាលពីថ្ងៃចន្ទ ហេតុដូចនេះ គ.ជ.ប នឹងបន្តអនុវត្តការងារទៅតាមច្បាប់ និងប្រតិទិនដែលបានកំណត់។
នាយកប្រតិបត្តិអង្គការឃ្លាំមើលការបោះឆ្នោត ហៅកាត់និចហ្វិច លោក ហង្ស ពុទ្ធា យល់ថា ករណីនៅតែមានបញ្ហាផ្ទៃក្នុង មិនទុកចិត្តគ្នាក្រោយពីបោះឆ្នោតហើយបែបនេះ គឺអាចបង្កនូវមានអសន្តិសុខដល់សង្គម និងពលរដ្ឋ។ លោកថា ជម្រើសដ៏ល្អនោះ គឺគប្បីស្នើឲ្យមានសមាសភាពអង្គការសហប្រជាជាតិ ចូលរួមដោះស្រាយបញ្ហានេះ ព្រោះកម្ពុជាក៏ជាសមាជិកនៃអង្គការអន្តរជាតិឯករាជ្យនេះ៕ Cambodia News
