ផឹកស៊ីជាមួយគ្នាគ្រាន់តែរឿងជុលកែវច្រឡំសង្សារទាញដបស្រាវាយក្បាល
សារព័ត៌មាន Cambodia News/
ភ្នំពេញ (០៣ កញ្ញា ២០១៤) ៖ ហេតុការណ៍ភ្ញាក់ផ្អើលមួយបានកើតឡើងដោយសារ ក្រុមយុវជន ប្រុសស្រីប្រមាណជិត ២០នាក់ បានចូលផឹកស៊ីក្នុងភោជនីយ៍ដ្ឋានយីហោ អង្គរថោន ហើយពេលស្រវឹងបានទាល់សម្តីគ្នារហូតផ្ទុះហឹង្សា យកដប ស្រាវាយក្បាលគ្នាបង្កការភ្ញាក់ផ្អើលពេញក្នុងហាង នឹងបណ្តាលអោយអ្នកខ្លះរងរបួស នឹងខ្លះទៀតរត់ចេញពីក្នុងហាងគេខ្លួនបាត់ស្រមោលអស់ ។
ហេតុការណ៍នេះបានកើតឡើងកាលពីវេលាម៉ោង ២២នឹង ៣០នាទីយប់ថ្ងៃទី ០២ ខែសីហា ឆ្នាំ ២០១៤ ស្ថិតនៅក្នុងហាង អង្គរថោន ផ្លូវលេខ ៤៣២ សង្កាត់បឹងត្របែក ខណ្ឌចំការមន ។ យោងតាមប្រភពព័ត៌មានពីអ្នករត់តុក្នុងហាងខាងលើបានអោយដឹងថា មុនពេលកើតហេតុគេបាន សង្កេតឃើញមានយុវជន ប្រុសស្រីប្រមាណជិត ២០នាក់ បានចូលមកផឹកស៊ី ក្នុងតុជាមួយគ្នា ដោយបានផឹកស៊ី និយាយលេងយ៉ាងសប្បាយ សើចស្អាកស្អាយពេញក្នុងហាង ។
លុះដល់ម៉ោងកើតហេតុមានយុវជនម្នាក់ បាន លើកកែវស្រាសុំជុលជាមួយនារីម្នាក់ជាសង្សាររបស់អ្នកផ្សេង ដូច្នេះយុវជនត្រូវជាសង្សាររបស់នារីរូបនោះឃើញ មានការអន់ចិត្ត ក៏បាននិយាយឌឺដងសម្តីដាក់គ្នាទៅវិញទៅមក បានប្រមាណ១០នាទីស្រាប់តែផ្ទុះហឹង្សា ក្នុងតុរបស់ពួកគេ ដោយទាល់ពាក្យសម្តីជជែកគ្នាខ្លាំងផ្អើលពេញក្នុងហាងរហូតធ្វើអោយភាគីទាំង ២ ទ្រាំមិនបាន ក៏ស្ទុះយកដបស្រាវាយគ្នាទៅវិញទៅមក បណ្តាលអោយភាគីម្ខាងរងរបួសធ្ងន់ស្រាល នឹងភាគីម្ខាងទៀតនាំ គ្នា រត់ចេញពីក្នុងហាងយកម៉ូតូគេចខ្លួនបាត់ស្រមោលអស់តែម្តងទៅ។
ក្រោយកើតហេតុសមត្ថកិច្ចមូលដ្ឋានបានចុះមកអន្តរាគមន៍ដល់កន្លែង នឹងបាននាំខ្លួនយុវជនប្រុសស្រី ចំនួន ៥នាក់ យកទៅធ្វើការសាកសួរជុំវិញបញ្ហាបង្កទម្លោះ រហូតវាយគ្នារបួសក្បាល នឹងដៃជើងបែបនេះ ។ នៅចំពោះមុខសមត្ថកិច្ចយុវជនម្នាក់ដែលរងរបួសបែកក្បាលបាននិយាយថា ដំបូងឡើយខ្លួនគ្រាន់តែសុំជុល កែវ ជាមួយនារីម្នាក់ជាសង្សាររបស់គេតែប៉ុណ្តោះ ដោយសារយល់ថាជាមិត្តរួមតុ ហើយមិនដឹងថាយុវជនម្នាក់ជាសង្សាររបស់នារីនោះខឹងសម្ប៉ានឹងរូបខ្លួនឡើយ ស្រាប់បានមួយសន្ទុះទើបកើតមានការប្រតាយប្រតបគ្នាតែម្តងទៅ៕
