និស្សិត ថៃ២នាក់ជាប់គុក ព្រោះសំដែងល្ខោនប្រមាថព្រះមហាក្សត្រ
សារព័ត៌មាន Cambodia News/
ថៃ (១៩ សីហា ២០១៤) ៖ យោងតាមអង្គការសិទ្ធិមនុស្ស Human Rights Lawyers និស្សិតថៃទាំង២រូប ដែលកំពុងជាប់ឃុំ រងការចោទប្រកាន់ពីបទប្រមាថព្រះមហាក្សត្រថៃ ពួកគេទាំង២ មានអាយុ២៣ឆ្នាំ និង២៥ឆ្នាំ។
កាលពីខែតុលា ឆ្នាំ២០១៣ និស្សិតទាំង២ បានសំដែងល្ខោនមួយរឿង មានអត្ថន័យទាក់ទងនឹងនយោបាយ។ ល្ខោននោះមានចំណងជើងថា “គូដណ្តឹងរបស់សត្វចចក”។ ល្ខោននេះ បានសំដែងនៅសកលវិទ្យាល័យ ថាមាសាត ក្រុងបាងកក ដើម្បីរំលឹកខួបនៃចលនាបះបោរនិស្សិត ខែតុលាឆ្នាំ១៩៧៣។ ចលនាបះបោរឆ្នាំ១៩៧៣ កាលណោះ ត្រូវបានកងទ័ពថៃបង្ក្រាប ដោយប្រើហិង្សាបង្ហូរឈាម។
អាជ្ញាធរថៃ ក្នុងរបបសឹកបច្ចុប្បន្ន បានចាប់ខ្លួននិស្សិតអាយុ២៣ឆ្នាំ កាលពីថ្ងៃសុក្រមុន ក្នុងពេលកោះហៅរូបគេអៅយទៅជំរំទាហានខេត្ត ខុន កែន ភាគខាងកើត។ យោងតាមសមាគមមេធាវី ការកោះហៅនៅខេត្តនេះ សម្រាប់សកម្មជនប្រឆាំងរដ្ឋាភិបាល គឺជាទំលាប់ទូទៅទៅហើយ តាំងពីយោធាថៃធ្វើរដ្ឋប្រហារថ្ងៃ២២ឧសភាមក។ និស្សិតមួយរូបទៀត អាយុ២៥ឆ្នាំ ត្រូវអាជ្ញាធរចាប់ខ្លួន កាលពីថ្ងៃសៅរ៍ នៅអាកាសយានដ្ឋាន ពេលរូបគេកំពុងត្រៀមឡើងយន្តហោះ ទៅធ្វើការនៅប្រទេសអូស្ត្រាលី។
របបសឹកថៃដែលកំពុងគ្រប់គ្រងប្រទេស ក្រោយរដ្ឋប្រហារថ្ងៃ២២ឧសភា បានខិតខំធ្វើខ្លួនជាអ្នកការពារព្រះមហាក្សត្រ ភូមិបុល អាឌុលយ៉ាដេ។ គេនៅចាំបានថា កាលពីចុងខែកក្កដា តន្ត្រីករមួយរូបត្រូវបានតុលាការកាត់ទោសអោយជាប់គុក១៥ឆ្នាំ ពីបទប្រើពាក្យសំដីប្រមាថរាជាថៃ។ តាំងពីមានរដ្ឋប្រហារយោធាមក រដ្ឋធម្មនុញ្ញទាក់ទងនឹងការប្រមាថព្រះមហាក្សត្រ ត្រូវបានគេសុំអោយធ្វើកំណែទម្រង់ឡើងវិញ។ អ្នកធ្វើការនៅមហាវិទ្យាល័យជាន់ខ្ពស់ ដែលបានទាមទារអោយជជែកពិភាក្សាបញ្ហានេះ ជាច្រើននាក់ ត្រូវបានកងទ័ពថៃកោះហៅ និងឃុំខ្លួនទុក នៅទីកន្លែងដ៏អាថ៌កំបាំង៕