ចម្រៀងកម្ពជាក្រោមរបស់អតីតតារាចម្រៀង ទួច ស៊ុននិច វាយសន្ធាប់លើ Facebook
សារព័ត៌មាន Cambodia News/
មួយរយៈចុងក្រោយនេះ គេឃើញបទចម្រៀងនិយាយពីទុក្ខវេទនារបស់ខ្មែរកម្ពុជាក្រោម និងការបាត់បង់ទឹកដីកម្ពុជាក្រោម ដែលបកស្រាយដោយតារាចម្រៀងទូច ស៊ុននិច ត្រូវបានគេឃើញបង្ហោះឡើងពេញFacebook ព្រមជាមួយការចាប់អារម្មណ៍យ៉ាងចម្លែកពីក្រុមអ្នកលេងFacebook។
សន្ទុះពេញនិយមចំពោះបទទាំងនេះ កើតឡើងបន្ទាប់ពីមានបរិបទ ទាមទារឲ្យមន្ត្រីស្ថានទូតវៀតណាម សុំទោសខ្មែរពាក់ព័ន្ធនឹងការអះអាងថា ទឹកដីខ្មែរកម្ពុជាក្រោមជារបស់វៀតណាម តាំងពីមុនការប្រគល់របស់បារាំង។
នៅលើបណ្ដាញFacebook បទចម្រៀងរបស់ទូច ស៊ុននិច ពាក់ព័ន្ធនឹងខ្មែរកម្ពុជាក្រោម មានប្រមាណជា៣បទ ត្រូវគេបង្ហោះ និងចែកចាយយ៉ាងគគ្រឹកគគ្រេងបំផុតពីសំណាក់យុវជន យុវនារី។ បទទាំងនេះ កន្លងមកទាល់តែចូលYoutube ហើយវាយពាក្យ«Touch Sunnix-Campuchea krom» ទើបអាចស្ដាប់បាន ប៉ុន្តែក្នុងពេលនេះ គេស្ទើរតែឃើញអណ្ដែតដដែលហើយដដែលទៀត នៅលើបណ្ដាញសង្គម Facebook។
អត្ថន័យបទចម្រៀងរបស់នាង មានខ្លឹមសារដាស់តឿនឲ្យខ្មែរក្រោកឡើង និងរៀបរាប់ពីទុក្ខវេទនារបស់ខ្មែរកម្ពុជាក្រោម។ យ៉ាងណាក៏ដោយ គេមិនសូវឃើញយុវវ័យច្រើននោះទេ ហ៊ានបញ្ចេញមតិពាក់ព័ន្ធនឹងបទទាំងនោះ ក្រៅពីសរសរថា ស្ដាប់ហើយស្រណោះណាស់ ប៉ុន្តែបើការ Share ចេញ គឺមានច្រើន៕
