ពលករខ្មែរ ១៤ នាក់ ដែលថៃចាប់ឃុំខ្លួន ត្រូវបានលែងមកវិញហើយ
សារព័ត៌មាន Cambodia News/
បន្ទាយមានជ័យ (04 កក្កដា 2014) ៖ អ្នកនាំពាក្យក្រសួងការបរទេស លោក កុយ គួង បាននិយាយនៅក្នុងសន្និសីទមួយនៅទីស្តីការក្រសួងការបរទេសនៅព្រឹកនេះថាពលករខ្មែរ ១៤ នាក់ ដែលថៃចាប់ឃុំខ្លួន ក្នុងខេត្តស្រះកែវ ប្រទេសថៃត្រូវបានដោះលែងមកវិញហើយ ដោយពួកគេបានត្រូវបញ្ជូនមកដល់ទីក្រុងប៉ោយប៉ែតនៅម៉ោងប្រមាណជា៩កន្លះព្រឹកថ្ងៃនេះ។
អ្នករាយការណ៍ព័ត៌មានរ បានរាយការណ៍ថា ពលករខ្មែរទាំង១៤នាក់នោះ បានត្រូវស្វាគមន៍និងជួបសំណេះសំណាលដោយអាជ្ញាធរដែនដីនៃខេត្តបន្ទាយមានជ័យ។ លោកគោស៊ុំ សារឿត អភិបាលខេត្តបន្ទាយមានជ័យ បាននិយាយទៅកាន់ពលករខ្មែរទាំង១៤នាក់នោះថា “នៅពេលដែលបងប្អូនចង់វិលត្រឡប់ទៅធ្វើការនៅប្រទេសថៃវិញត្រូវទៅឲ្យមានច្បាប់ត្រឹមត្រូវ ជៀសវាងដូចករណីដែលកើតមានកន្លងមកនេះ”។
គួរបញ្ជាក់ថា ពលករខ្មែរទាំង ១៤នាក់នោះ ត្រូវបានអាជ្ញាធរថៃ ចាប់ឃុំខ្លួន ដោយចោទប្រកាន់ពីបទ កាន់ឯកសារឆ្លងដែនក្លែងក្លាយ តាមរយៈការចាញ់បោកមេខ្យល់តែប៉ុណ្ណោះ។ ដូច្នេះតុលាការខេត្តស្រះកែវ បានសម្រេចទម្លាក់ការចោទប្រកាន់លើពួកគេវិញ៕