ចិនលុបចោលការនាំចេញឧបករណ៍ដែលអាចប្រើសំរាប់ផលិតអាវុធនុយក្លេអ៊ែរទៅអោយកូរ៉េខាងជើង
ចិនបានប្រកាសលុបចោលរាល់ការនាំចេញ សម្ភារៈនានា ដែលអាចប្រើផលិតជាមីស៊ីល រឺក៏អាវុធនុយ ក្លេអ៊ែរ ទៅអោយប្រទេសកូរ៉េខាងជើង។ កាលពីថ្ងៃចន្ទកន្លងទៅ ក្រសួងពាណិជ្ជកម្មចិន និងរដ្ឋបាលរដ្ឋចិនចំនួនបី បានចេញបញ្ជីកម្រាស់២៣៦ទំព័រមួយ ជាសាធារណៈ បង្ហាញពីសម្ភារៈដែលហាមឃាត់មិនអោយនាំចេញទៅកូរ៉េខាងជើង ដែលមានដូចជា ធាតុផ្សេងៗអាចប្រើសំរាប់ផលិតគ្រឿងផ្ទុះ រឺក៏ប្រព័ន្ធកាំជ្រួចជាដើម។
ការដែល ចិនប្រកាសលុបចោលការនាំចេញរាល់ឧបករណ៍ដែលអាចប្រើ ផលិតជាមីស៊ីល រឺក៏ជាអាវុធនុយក្លេអ៊ែរ ទៅអោយកូរ៉េខាងជើងនេះ គឺទាក់ទងទៅនឹងសេចក្តីសំរេចផ្សេងៗរបស់ក្រុមប្រឹក្សាសន្តិសុខអង្គការ សហប្រជាជាតិ ដែលបានហាមឃាត់ការផ្តល់សព្វាវុធទៅអោយរដ្ឋាភិបាលក្រុងព្យុងយ៉ាង។ នេះបើយោងតាមការអះអាងរបស់អ្នកទទួលខុសត្រូវផ្នែករដ្ឋបាលចិន។
កាលពី ថ្ងៃចន្ទកន្លងទៅ ក្រសួងពាណិជ្ជកម្មចិន និងរដ្ឋបាលរដ្ឋចិនចំនួនបី បានចេញផ្សាយជាសាធារណៈនូវបញ្ជីកម្រាស់២៣៦ទំព័រមួយ បង្ហាញនូវឧបករណ៍ដែលហាមឃាត់មិនអោយនាំចេញទៅកូរ៉េខាងជើង មានដូចជា ប្រព័ន្ធកាំជ្រួច រឺក៏ធាតុផ្សេងៗដែលអាចបំផ្លែងអោយទៅជាធាតុផ្ទុះនៃអាវុធ នុយក្លេអ៊ែរ។
គួររំលឹកថា កាលពីឆ្នាំ២០០៦ និងឆ្នាំ២០០៩ អង្គការសហប្រជាជាតិបានអនុម័តទណ្ឌកម្មចំនួនពីរ ប្រឆាំងទៅនឹងក្រុងព្យុងយ៉ាង បន្ទាប់ពីក្រុងព្យុងយ៉ាងបានសាកល្បងនុយក្លេអ៊ែររួចមក។ ទណ្ឌកម្មទាំងពីរនោះ គឺជាការហាមឃាត់មិនអោយបញ្ជូនសព្វាវុធធុនធ្ងន់ និងរាល់ប្រព័ន្ធបច្ចេកវិទ្យា ដែលអាចប្រើផលិតជាអាវុធនុយក្លេអ៊ែរ និងគ្រឿងឧបសម្ព័ន្ធទៅអោយកូរ៉េខាងជើង។ បន្ទាប់ពីក្រុងព្យុងយ៉ាងបានជួបបរាជ័យក្នុងការសាកល្បងបាញ់បង្ហោះ ផ្កាយរណបនៅឆ្នាំ២០១២មក អង្គការសហប្រជាជាតិបានពង្រឹងទណ្ឌកម្មនេះបន្ថែមទៀត ពិសេសនៅពេលដែលកូរ៉េខាងជើងបានសាកល្បងនុយក្លេអ៊ែរជាលើកទីពីរ និងជាលើកទីបីក្រោយៗមកទៀត។
ដោយឡែក ចិនបានបដិសេធមិនទទួលស្គាល់ថា ខ្លួនបានប្រគល់យានយន្តសំរាប់បាញ់មីស៊ីលទៅអោយកូរ៉េខាងជើង កាលពីឆ្នាំ២០១១ ដូចដែលកាសែតជប៉ុនមួយ បានចុះផ្សាយនោះទេ។
គួរបញ្ជាក់ថា អ្នកជំនាញអន្តរជាតិធ្លាប់បានចោទក្រុងប៉េកាំង ថាបានរំលោភទណ្ឌកម្មអង្គការសហប្រជាជាតិ ដោយសារតែនៅក្នុងការដង្ហែក្បួនយោធាក្រុងព្យុងយ៉ាង ពួកគេបានសង្កេតឃើញមាន យានយន្តសំរាប់បាញ់មីស៊ីលរបស់ចិនមួយគ្រឿង។
ទោះយ៉ាងនេះក្តី ចិនបានធានាប្រាប់អាមេរិកថា ខ្លួនគោរពទៅតាមទណ្ឌកម្មអង្គការសហប្រជាជាតិ ដែលបានដាក់ទៅលើក្រុងព្យុងយ៉ាង៕ដោយ ព្រំ សឿន សូលីណា (RFI)
