លោក ហ៊ុន សែន ជម្រុញឲ្យរដ្ឋាភិបាលយោធាថៃ ដោះលែងពលករខ្មែរដែលជាប់ឃុំ
សារប័ត៌មាន Cambodia News/
ភ្នំពេញ (២៦ មិថុនា ២០១៤) ៖ ក្នុងទិវាអន្តរជាតិប្រយុទ្ធប្រឆាំងគ្រឿងញៀន នៅមជ្ឈមណ្ឌលកោះពេជ្រ នាថ្ងៃទី២៦ខែមិថុនា នេះលោក នាយករដ្ឋមន្ត្រី ហ៊ុន សែន អំពាវនាវឲ្យរដ្ឋាភិបាលយោធាថៃ ដោះលែងពលករខ្មែរជាងដប់នាក់ ដែលត្រូវបានថៃចាប់ឃុំខ្លួន ករណីប្រើឯកសារឆ្លងដែនក្លែងក្លាយ។
លោក ហ៊ុន សែន បន្តថា ពលករខែ្មរ ដែលប្រើឯកសារឆ្លងដែនក្លែងក្លាយគឺជាកំហុសដោយអចេតនា ហើយថាសូម្បីតែហត្ថលេខារបស់លោក ក៏មានអ្នកបន្លំបានដែរ។ ដូច្នេះលោកស្នើឲ្យមន្ត្រីស្ថានទូតថៃ នាំសាររបស់លោកទៅកាន់លោកប្រាយុទ្ធ ចាន់អូចា ឲ្យដោះលែងអ្នកទាំងនោះ។
តាមរបាយការណ៍ក្រសួងមហាផ្ទៃឲ្យដឹងថា គិតពីថ្ងៃទី០៦ ដល់២២ខែមិថុនានេះ មានពលករខ្មែរជាង២២ម៉ឺននាក់ត្រូវបានរដ្ឋាភិបាលយោធាថៃបញ្ជូនមក កម្ពុជាវិញ ក្នុងនោះមានអ្នកស្លាប់៨នាក់ និងរបួស១៦នាក់ក្នុងគ្រោះថ្នាក់ចរាចរណ៍នៅប្រទេសថៃ៕
