សាលារាជធានីភ្នំពេញកំណត់យកភ្លើងស្តុប ៦កន្លែង ជាភ្លើងស្តុបគំរូ
សារព័ត៌មាន Cambodia News/
ភ្នំពេញ (២៤ មិថុនា ២០១៤) ៖ សាលារាជធានីភ្នំពេញ បានកំណត់យកភ្លើងស្តុប ៦កន្លែង ក្នុងនោះ មានដូចជា ភ្លើងស្តុបកាណាឌីយ៉ា ស្តុបទួលគោក ស្តុបអាងទឹកអូឡាំពិក ស្តុបបូកគោ ស្តុបពេទ្យចិន និងស្តុបផ្សារដើមគរ ដើម្បី បញ្ចប់សកម្មភាពកុមារអនាថា ជនអនាថា ដែលដើរសុំទាន ឬដើរលក់ផ្កា។បើវិធានការទទួលបានជោគជ័យ នោះ ភ្លើងស្តុបទាំង៦កន្លែងនោះនឹងក្លាយជាភ្លើងស្តុបគំរូ។
នេះបើយោងតាមការ ចុះផ្សាយរបស់ គេហទំព័រ សាលារាជធានីភ្នំពេញកាលពីថ្ងៃទី២៣មិថុនា។
ក្នុងគេហទំព័រដដែលបានបង្ហាញថា នេះគឺជាវិធានការ ដែលអាជ្ញាធរ អះអាងថា ដើម្បីកុំឲ្យមានផលប៉ះពាល់ដល់សណ្តាប់ធ្នាប់សាធារណៈ និងប៉ះពាល់ដល់អ្នកធ្វើដំណើរទូទៅដែលឆ្លងកាត់តាមភ្លើងស្តុបទាំងនោះ។
គួរកត់សម្គាល់ថា កន្លងមក មានប្រជាពលរដ្ឋជាច្រើន បានរិះគន់ សកម្មភាពជនអនាថា និងអ្នកសុំទាន ដែលបានបង្កអនាធិបេតយ្យ នៅតាមភ្លើងស្តុបក្នុងរាជធានីភ្នំពេញ ថា សាលារាជធានីភ្នំពេញគ្មានចំណាត់ការលើបញ្ហានេះ៕
