ពលករម្នាក់ ចំណាយអស់ ៤៩ ដុល្លារ ដើម្បីទៅធ្វើការនៅថៃស្របច្បាប់
សារព័ត៌មាន Cambodia News/
ភ្នំពេញ (២៥ មិថុនា ២០១៤) ៖ កាលពីព្រឹកថ្ងៃអង្គារ ទី២៤ ខែមិថុនា ម្សិលមិញ ក្រសួងការងារ និងបណ្តុះបណ្តាលវិជ្ជាជីវៈ បានបើកកិច្ច ប្រជុំជាមួយនឹងក្រុមហ៊ុនភ្នាក់ងារបញ្ជូនពលករទៅក្រៅប្រទេស ចំនួនជាង ៤០ ក្នុងកិច្ចប្រជុំនោះ ក្រសួងការងារ បានសម្រេច អនុញ្ញាតឲ្យក្រុមហ៊ុនភ្នាក់ងារបញ្ជូនពលករ ចេញទៅធ្វើការនៅប្រទេសថៃ ក្នុងនាមជាពលករស្របច្បាប់។
សេចក្តីជូនដំណឹងរបស់ក្រសួងការងារ បានបញ្ជាក់ថា ក្រុមហ៊ុនភ្នាក់ងារបញ្ជូនពលករទៅក្រៅប្រទេស ចំនួនជាង ៤០ ក្រុមហ៊ុន ដែលត្រូវបានក្រសួងការងារ កំណត់ឲ្យសម្របសម្រួលធ្វើបែបបទដល់ក្រុមពលករខ្មែរស្របច្បាប់ ទៅធ្វើការនៅប្រទេសថៃ។
ក្នុងនោះ ពលករម្នាក់ ត្រូវបង់ប្រាក់ចំណាយលើសេវាសរុប ៤៩ ដុល្លារ រួមមាន៖ ប័ណ្ឌពលករ កម្ពុជា ទៅធ្វើការនៅបរទេស ចំនួន ១០ ដុល្លារ ថ្លៃលិខិតឆ្លងដែន ៤ ដុល្លារ ទិដ្ឋាការការងារ នៅស្ថានទូតថៃ ប្រចាំប្រទេសកម្ពុជា ២០ ដុល្លារ ប្រាក់សោហ៊ុយធ្វើដំណើរទៅកាន់ក្រុងប៉ោយប៉ែត ១០ ដុល្លារ និងប្រាក់អាហារតាមផ្លូវធ្វើដំណើរ ចំនួន ៥ ដុល្លារ។
ក្រសួងការងារ ក៏បានប្រកាសថា ពលករ ដែលមានបំណងទៅធ្វើការស្របច្បាប់នៅប្រទេសថៃ សូមអញ្ជើញទំនាក់ទំនង តាមមន្ទីរការងារ និងបណ្តុះបណ្តាលវិជ្ជាជីវៈ រាជធានី-ខេត្ត ដើម្បីទទួលព័ត៌មាន និងចុះឈ្មោះជាមួយទីភ្នាក់ងារជ្រើសរើសពលករកម្ពុជា៕
