ពេជ្រ អាវីហ្សា គូស្នេហ៍ជួយជម្រុញឲ្យចូលច្រៀង
សារព័ត៌មាន Cambodia News/
ភ្នំពេញ (១២ មិថុនា ២០១៤) ៖ មួយរយៈពេលនេះ គេសង្កេតឃើញថា តារាស្រីសាច់សរម៉ដ្ឋរលោង កញ្ញា ពេជ្រ អាវីហ្សា ហាក់បង្ហាញមុខមាត់ នៅតាមកញ្ចក់ទូរទស្សន៍ ជាមួយការច្រៀង តាមខនសឺត ប្រៀបដូចជាតារាចម្រៀងអាជីព ខណៈដែលមុនៗ នាងបង្ហាញវត្តមានត្រឹម តែការសម្តែង ថតស្ពត និងចេញមុខសម្ភាសន៍ ក្នុងកម្មវិធីតារាបន្តិចបន្តួច តែប៉ុណ្ណោះ។
ប៉ុន្តែពេលនេះ ពេជ្រ អាវីហ្សា បែរជាបង្ហាញ វត្តមាននៅកញ្ចក់ទូរទស្សន៍ ច្រៀង និងបង្ហាញក្បាច់រាំ យ៉ាងរស់រវើក នៅលើឆាកតន្ត្រី មិនដាច់ទៅវិញ ។ តាមការវិវឌ្ឍន៍ខ្លួនពីសម្តែងមកច្រៀង បានលឿនបែបនេះ ត្រូវបានមហាជនដាក់ការសង្ស័យថា អាចមានការជួយណែនាំ និងជម្រុញ ពីគូស្នេហ៍ដែលត្រៀមចូលរោងការ ជាមួយនាង គឺលោក រ៉េត ធីដូណា។
កញ្ញា អាវីហ្សា ទទួលស្គាល់ថា នាងមានការសប្បាយចិត្ត នៅពេលដែលបានវិវឌ្ឍន៍ខ្លួន មកចាប់អាជីពថ្មីមួយទៀត ព្រោះថា សម្រាប់នាង ការសម្តែង គឺមិនសូវ ធ្វើឲ្យកេរ្តិ៍ឈ្មោះ ល្បី សុះសាយខ្លាំងទេ ម្តងឡើងម្តងចុះ ពេលណាបានសម្តែងច្រើនឈ្មោះក៏លោតឡើង ពេលណាមិនសូវមានការសម្តែង ឈ្មោះក៏ស្ងាត់ឈឹង៕
