សុខ សុម៉ាវត្តី រិះគន់សកម្មភាពយុវវ័យមួយគូ
សារព័ត៌មាន Cambodia News
ភ្នំពេញ ( 06 មិថុនា 2014) ៖ អតីត ពិធីការិនីឈានមុខរបស់ស្ថានីយ៍ទូរទស្សន៍បាយ័ននាង សុខ សុម៉ាវត្តី កាលពីពេលថ្មីៗនេះ បានធ្វើការរិះគន់ធ្ងន់ៗ ទៅលើសកម្មភាពមិនសមរម្យមួយ របស់យុវវ័យមួយគូ ដែលបានប្រព្រឹត្តិនៅពីមុខប្រាសាទអង្គរវត្តដែលជាទីរមណីយដ្ឋាន ទេសចរណ៍វប្បធម៌ប្រវត្តិសាស្ត្រ មិនអាចកាត់ថ្លៃបាន របស់ប្រទេសកម្ពុជា។
តារាសម្តែងស្រីកូនមួយរូបនេះបានធ្វើការរិះគន់ខ្លាំងៗតាមរយៈសារ បង្ហោះនៅលើបណ្តាញទំនាក់ទំនងសង្គម Facebook របស់ខ្លួនផ្ទាល់ ដោយមានភ្ជាប់ជាមួយនូវរូបថតមួយសន្លឹក បង្ហាញអំពីសកម្មភាពរបស់យុវវ័យមួយគូ អង្គុយថើបគ្នាជាលក្ខណៈគូស្នេហ៍នៅលើកូនត្នោតព្រែកជាពីរនៅពីមុខ ប្រាសាទអង្គរវត្ត។
ក្នុងសារនោះនាង សុខ សុម៉ាវត្តី បានលើកឡើងថា “ អ្នកគិតថានេះជាសិទ្ធិរបស់អ្នក តែសូមអោយតម្លៃមកលើប្រាសាទអច្ឆរិយមួយនេះផង ” ។ សារបន្តថា “ វប្បធម៌ សីលធម៌ ប្រពៃណីត្រូវបានកូនខ្មែរមួយចំនួនជាន់ឈ្លី ខ្វះការទទួលខុសត្រូវដោយខ្លួនផ្ទាល់ ជាប្រជាជនខ្មែរ ចាប់យកអរិយធម៌ វប្បធម៌ក្រៅប្រទេសយកមកប្រើ ,ចំពោះជាតិសាសន៍របស់គេ គេធ្វើយ៉ាងណា នោះជាប្រពៃណីរបស់គេ ចំណែកកូនខ្មែរធ្វើរបៀបនេះ ប្រពៃណីខ្មែរនឹងធ្លាក់ចុះ”។
គេមិនទាន់ដឹងថា យុវវ័យមួយគូដែលបានបង្ហាញភាពផ្អែមល្ហែមជាមួយគ្នាមុខ ប្រាសាទអង្គរវត្តនៅក្នុងរូបថតដែលរងការរិះគន់ពីសំណាក់នាង សុខ សុម៉ាវត្តី គឺជាជាតិសាសន៍អ្វីអោយពិតប្រាកដនោះទេ។ ប៉ុន្តែយ៉ាងណាក៏ដោយបើជាតិសាសន៍ខ្មែរមែន ធ្វើបែបនេះពិតជាជះឥទ្ធិពលដល់ប្រពៃណី វប្បធម៌របស់ជាតិបន្តិចហើយ គួរតែកែលំអរ៕
