បុគ្គលិកកាល់តិចបន្ដផ្ទុះកូដកម្ម ខណៈខាងក្រុមហ៊ុនមិនទាន់មានដំណោះស្រាយ
សារព័ត៌នមាន Cambodia News/
ភ្នំពេញ (១៥ ឧសភា ២០១៤) ៖ កាលពីព្រឹកថ្ងៃទី១៤ ខែឧសភា ម្សិលមិញ បុគ្គលិកក្រុមកាល់តិចនៅតែបន្ដធ្វើ កូដកម្មរបស់ខ្លួន ដោយបានប្រមូលផ្ដុំគ្នានៅស្ថានីយ កាល់តិចសាខានៅស្ដុបបូកគោ ដោយបានស្រែកទាមទារឲ្យភាគីក្រុមហ៊ុនរកដំណោះស្រាយជូនពួកគេ ក្នុងការទាមទារដំឡើងប្រាក់ខែ១៦០ដុល្លារ និងប្រាក់ខែទី១៣។
ការសម្រេចបន្តធ្វើកូដកម្មនេះ ដោយសារភាគីបុគ្គលិកកាល់តិចបានច្រានចោល មិនទទួលយកលទ្ធផលរបស់ភាគីក្រុមហ៊ុន ដែលបានសុំពន្យាពេលលើកយកបញ្ហានេះ ទៅពិភាក្សានៅពេល២ ទៅ៣ខែខាងមុខទៀត។
កន្លងមកនេះបុគ្គលិកក្រុមហ៊ុនកាល់តិចទទួលបានប្រាក់ខែ ទៅតាមផ្នែកនីមួយៗដូចជាបុគ្គលិកផ្នែកសំអាត នៅក្រុមហ៊ុនប្រេងឥន្ធនៈCaltex ទទួលបានប្រាក់ឈ្នួលក្នុងមួយខែត្រឹមតែ១០០ដុល្លារ បុគ្គលិកផ្នែកចាក់សាំងទទួលបានប្រាក់ឈ្នួលក្នុងមួយខែ១២០ ដុល្លារ និងបុគ្គលិកផ្នែកបេឡា ទទួលបានប្រាក់ឈ្នួលក្នុងមួយខែ១៣០ដុល្លារ។
សូមបញ្ជាក់បន្តិចដែរថា ការផ្ទុះកូដកម្មរបស់បុគ្គលិកធ្វើការនៅក្រុមហ៊ុនកាល់តិច នាំគ្នាតវ៉ាទាមទារប្រាក់ខែគោលចំនួន ១៦០ដុល្លារ និងប្រាក់ខែទី១៣ នៅគ្រប់សាខាប្រមាណជា២៦ នៅតាមបណ្តាខេត្តរាជធានី ដោយពួកគេភាគីច្រើនបានលើកឡើងថា ប្រាក់ខែទាបធ្វើឲ្យពួកគេពិបាកផ្គត់ផ្គង់ជីវភាព ខណៈតម្លៃទំនិញនៅលើទីផ្សារចេះតែឡើងថ្លៃខ្ពស់ ជាងចំណូលរបស់ពួកគេ៕
