នាយករដ្ឋមន្ត្រី ហ៊ុន សែន ជំរុញឲ្យមន្ត្រីថ្នាក់ក្រោមពង្រឹងជំនាញដល់កសិករ
សារព័ត៌មាន Cambodia News/
ភ្នំពេញ (២៨ មិនា ២០១៤) ៖ ថ្លែងក្នុងពិធីបិទសន្និបាត បូកសរុបការងារប្រចាំឆ្នាំ២០១៣ របស់ក្រសួងកសិកម្ម រុក្ខាប្របាញ់ និងនេសាទនៅព្រឹកថ្ងៃទី២៨ ខែមិនា នេះ លោកនាយករដ្ឋមន្ត្រី ហ៊ុន សែន បាន ជំរុញដល់មន្ត្រីរបស់ថ្នាក់ក្រោម ពិសេសក្រសួងកសិកម្ម ឲ្យពង្រឹងសមត្ថភាពជំនាញដល់កសិករ ដើម្បីធានានូវកសិផលមានកម្រិតស្តង់ដារ ដើម្បីមានលទ្ធភាពប្រកួតប្រជែង នៅទីផ្សារអន្តរជាតិ។
ក្នុងពិធីនោះ លោកនាយករដ្ឋមន្ត្រីក៏បាន បញ្ជាឲ្យមន្ត្រីថ្នាក់ក្រោមរបស់លោក ពង្រឹងសមត្ថភាពជំនាញកសិករ ឲ្យបានប្រសើរជាងបច្ចុប្បន្ន ដើម្បីមានលទ្ធភាពខ្ពស់ក្នុងការនាំយកកសិផលទាំងនោះ ទៅប្រកួតប្រជែងលើទីផ្សារអន្តរជាតិ។
មន្ត្រីទំនាក់ទំនងព័ត៌មាននៃអង្កការកសិកម្មមួយ ហៅកាត់ថា សេដាក លោក ហ៊ីម ខទៀត មានប្រសាសន៍ថា គ្រាន់តែការជំរុញបែបនេះ នៅមិនទាន់គ្រប់គ្រាន់ទេ ព្រោះបច្ចុប្បន្នប្រជាកសិករនៅជួបនិងបញ្ហាជាច្រើន ទាក់ទងនឹងការធ្វើកសិកម្ម ជាពិសេសពួកគាត់មិនទាន់មានជំនាញច្បាស់លាស់នៅឡើយ។
បច្ចុប្បន្នក្នុងចំណោមប្រជាជនកម្ពុជាជាង ១០លាននាក់ មានប្រមាណពី ៨០ទៅ៨៥ភាគរយ ជាកសិករប្រកបរបរកសិកម្ម។ តែរបាយ ការណ៍អង្គការសេដាក ដែលធ្វើលើការលើវិស័យកសិកម្មធ្លាប់លើកឡើងថា ឧបសគ្គនៃការអភិវឌ្ឍន៍វិស័យកសិកម្មនៅពេលបច្ចុប្បន្នគឺ កសិករមិនសូវមានជំនាញ ខ្វះការចងក្រងសមាគមកសិករ ខ្វះដើមទុន កសិផលលក់បានតម្លៃទាបជាដើម៕
